مریم نواز نے عمرہ پر جانے کی اجازت کیلئے لاہور ہائیکورٹ سے رجوع کر لیا

لاہور:پاکستان مسلم لیگ ن کی نائب صدر مریم نواز نے عمرہ پر جانے کی اجازت کے لیے لاہور ہائی کورٹ سے رجوع کرلیا ہے۔

لاہور ہائیکورٹ کے جسٹس شہباز علی رضوی اور جسٹس انوار الحق پنوں پر مشتمل بینچ آج مریم نواز کی عمرہ پر جانے کی اجازت کی درخواست پر سماعت کرے گا۔

مریم نواز نے اپنی درخواست میں موقف اختیار کیا کہ میں نے اپنا پاسپورٹ لاہور ہائیکورٹ میں جمع کرایا تھا، میں عمرہ کرنے سعودی عرب جانا چاہتی ہوں لیکن ایسا نہیں کر سکتی کیونکہ میرا پاسپورٹ لاہور ہائیکورٹ میں جمع ہے۔

انہوں نے عدالت سے استدعا کی کہ ایک بار عمرہ پر جانے کی اجازت دی جائے اور ان کا پاسپورٹ عارضی طور پر واپس کرنے کے احکامات جاری کیے جائیں۔

مزید پڑھیں:آئی ایم ایف سے مذاکرات کیلئے وزیرخزانہ مفتاح اسماعیل امریکا روانہ

یہاں یہ بات قابل ذکر ہے کہ لاہور ہائیکورٹ نے چوہدری شوگر ملز کیس میں مریم نواز کی ضمانت منظور کرتے ہوئے انہیں اپنا پاسپورٹ حوالے کرنے کا حکم دیا تھا۔

نومبر 2019 میں لاہور ہائی کورٹ نے مریم نواز کی ضمانت منظور کی تھی جنہیں 8 اگست کو چوہدری شوگر ملز کیس میں گرفتار کیا گیا تھا۔

جسٹس علی باقر نجفی اور جسٹس سردار احمد نعیم پر مشتمل ہائی کورٹ کے دو رکنی بینچ نے فیصلہ سناتے ہوئے مسلم لیگ (ن) کی رہنما کو حکم دیا تھا کہ وہ دو ضمانتی بانڈز جمع کرائیں اور اپنا پاسپورٹ عدالت کے پاس رکھوائیں۔