منی لانڈرنگ کیس، شہباز شریف کی حاضری سے استثنیٰ کی درخواست

لاہور: پاکستان مسلم لیگ (ن) کے صدر شہباز شریف نے منی لانڈرنگ کیس میں حاضری سے استثنیٰ کی درخواست دے دی ہے جس کا مقصد آج ہونے والے ملک کے 23ویں وزیر اعظم کے انتخاب میں امیدوار کی حیثیت سے حصہ لینا ہے۔

تفصیلات کے مطابق اسپیشل سنٹرل عدالت لاہور میں منی لانڈرنگ سے متعلق کیس کی سماعت آج ہورہی ہے۔ عدالت نے فردِ جرم عائد کرنے کیلئے وزیر اعظم کے عہدے کے نامزد امیدوار شہباز شریف اور اپوزیشن لیڈر حمزہ شہباز کو آج طلب کیا تھا۔

یہ بھی پڑھیں:

عمران خان کی زیر صدارت پی ٹی آئی پارلیمانی پارٹی کا اجلاس آج طلب

ن لیگ کےصدر شہباز شریف کے وکلاء نے ان کی حاضری سے استثنیٰ کی درخواست عدالت میں جمع کرادی جس میں مؤقف اختیار کیا گیا ہے کہ درخواست گزار شہباز شریف وزیر اعظم کے انتخاب کیلئے اسلام آباد میں ہیں۔ 

درخواست کے متن میں عدالت سے استدعا کی گئی ہے کہ حاضری سے استثنیٰ دیا جائے۔ پراسیکیوٹرز کی ٹیم بھی شہباز شریف اور حمزہ شہباز کے کیس کی پیروی کیلئے پیش نہیں ہوگی جن کا کہنا ہے کہ ٹیم کا ایک رکن عدالت میں پیش ہو کر آگاہ کرے گا۔

پراسیکیوٹرز کا کہنا ہے کہ شہباز شریف اور حمزہ شہباز کے ایف آئی اے مقدمے میں پیش نہ ہونے کی ہدایات ملی ہیں۔ کیس میں خصوصی ٹیم کو مقدمے کی پیروی کے فرائض سونپے گئے تھے۔ عدالت شہباز شریف کی درخواست منظور کرے گی۔