سی ٹی ڈی کی کارروائی، 5 دہشت گرد ہلاک، اسلحہ اور بارود برآمد

بنوں: محکمۂ انسدادِ دہشت گردی (سی ٹی ڈی) نے صوبہ خیبر پختونخوا میں کارروائی کرتے ہوئے 5 دہشت گردوں کو موت کے گھاٹ اتار دیا جبکہ ملزمان کے قبضے سے اسلحہ اور گولہ بارود بھی برآمد ہوئے ہیں۔

تفصیلات کے مطابق خیبر پختونخوا کے شہر بنوں میں کارروائی کرتے ہوئے سی ٹی ڈی نے 5دہشت گردوں کو ہلاک کیا۔ حکام کا کہنا ہے کہ ہلاک ملزمان کے قبضے سے 3 کلاشنکوف، نائن ایم ایم پستول اور بارود برآمد ہوا۔

یہ بھی پڑھیں:

پنجگور، نوشکی دہشتگرد حملوں کے سہولت کار کراچی سے گرفتار

سی ٹی ڈی کے بیان کے مطابق ہلاک دہشت گردوں کے قبضے سے کاروس، نقد رقم، موبائل فونز، موٹر سائیکل اور نصب شدہ آئی ای ڈی بم بھی برآمد ہوا۔ آپریشن کے دوران فرار ہونے والے دہشت گردوں کو تلاش کیا جارہا ہے۔

محکمۂ انسدادِ دہشت گردی کا کہنا ہے کہ آپریشن کے دوران جن دہشت گردوں کو ہلاک کیا گیا، وہ بم دھماکوں، سکیورٹی فورسز پر حملوں اور ٹارگٹ کلنگ سمیت دہشت گردی کے دیگر جرائم میں ملوث اور کالعدم تنظیم سے تعلق رکھتے تھے۔

خیال رہے کہ اس سے قبل کراچی پولیس اور حساس اداروں نے بلال کالونی میں مشترکہ کارروائی کرتے ہوئے پنجگور اور نوشکی حملوں کے 2 مبینہ سہولت کاروں کو گرفتار کرلیا۔نوشکی اور پنجگور میں دہشت گردوں نے حملہ کیا تھا۔ 

میڈیا سے گفتگو کرتے ہوئے 6 روز قبل سینئر سپرنٹنڈنٹ آف پولیس (ایس ایس پی) انویسٹی گیشن (سنٹرل) شہلا قریشی نے بتایا کہ چھاپہ ان علاقوں میں ملزمان کی موجودگی سے متعلق خفیہ اطلاعات پر مارا گیا اور سہولت کار پکڑے گئے۔