خیبر پختونخوا میں 3 ماہ میں دہشت گردی کے خلاف 644آپریشنز ہوئے۔سی ٹی ڈی

محکمۂ انسدادِ دہشت گردی (سی ٹی ڈی) کا کہنا ہے کہ خیبر پختونخوا میں 3 ماہ میں دہشت گردی کے خلاف 644 آپریشنز ہوئے جن کے دوران 19 دہشت گردوں کو ہلاک کیا گیا۔

تفصیلات کے مطابق محکمۂ انسدادِ دہشت گردی نے پشاور میں جرائم کی سہ ماہی رپورٹ میں بتایا کہ کے پی کے میں گزشتہ 3 ماہ میں دہشت گردی کے 72 واقعات رپورٹ جبکہ خفیہ اطلاعات کی بنیاد پر 644 آپریشنز ہوئے۔

یہ بھی پڑھیں:

شادی ہال سے ٹکڑوں میں کٹی ہوئی خاتون کی لاش برآمد

سی ٹی ڈی کا کہنا ہے کہ آپریشن سائلنس خیبر سرحدی علاقے میں ہوا، کوچۂ رسالدار میں ملوث سہولت کار ہلاک ہوگئے جبکہ صوبے میں مختلف آپریشنز کے دوران 19 دہشت گردوں کو ہلاک کیا گیا۔ ٹارگٹ کلنگ کے 15 واقعات رپورٹ ہوئے۔

مختلف آپریشنز کے دوران 59 مطلوب اشتہاری مجرموں اور 9 دہشت گردوں کو حراست میں لیا گیا۔ بھتہ خوری کے 10 واقعات بھی رپورٹ ہوئے۔ مختلف آپریشنز کے دوران 65 کلوگرام بارودی مواد، ایک خودکش جیکٹ، 76 گرنیڈز برامد ہوئے۔

حکام کا کہنا ہے کہ دہشت گردوں کے خلاف جنگ جاری رہے گی۔ مختلف آپریشنز کے دوران سی ٹی ڈی اہلکاروں نے 10 ایس ایم جی گنز اور 36 آر پی جے شلز بھی برآمد کیے۔ دہشت گردوں کے خلاف مزید کارروائی بھی جاری ہے۔