او آئی سی سیکریٹری جنرل اور اسلامی ممالک کے وزرائے خارجہ کی پاکستان آمد

اسلامی تعاون تنظیم (او آئی سی) کے سیکریٹری جنرل حسین ابراہیم اسلام آباد پہنچ گئے جبکہ  مختلف مسلم ممالک کے وزرائے خارجہ کی پاکستان آمد کا سلسلہ جاری ہے۔

تفصیلات کے مطابق سیکریٹری جنرل حسین ابراہیم پاکستان پہنچ گئے۔ معزز مہمان کا ائیرپورٹ پر پر تپاک استقبال کیا گیا۔ انڈونیشیا کے نائب وزیر خارجہ عبدالقادر جیلانی بھی اسلام آباد پہنچے جہاں پاکستانی حکام نے انہیں خوش آمدید کہا۔

یہ بھی پڑھیں:

او آئی سی ٹریفک پلان، اسلام آباد میں ریڈ زون سمیت مختلف علاقے آج سے بند

صومالیہ، نائجیریا اور گیمبیا سمیت مختلف دیگر ممالک کے وزرائے خارجہ بھی اسلام آباد پہنچے ہیں جہاں اسلامی تعاون تنظیم کا اجلاس منعقد ہورہا ہے۔ مالدیپ کے مستقل مندوب اور سعودی عرب میں بنگلہ دیش کے سفیر بھی پاکستان پہنچ گئے۔

سویڈن کا وفد اور آذر بائیجان کے ڈپٹی وزیر خارجہ بھی او آئی سی اجلاس میں شرکت کیلئے اسلام آباد پہنچے۔ وزیر خارجہ شاہ محمود قریشی کی زیر قیادت سفارتی عملے اور دیگر اعلیٰ حکام نے معزز مہمانوں کا پاکستان آمد پر استقبال کیا۔

واضح رہے کہ اسلام آباد میں او آئی سی اجلاس کے موقعے پر 21 سے 24 مارچ تک ریڈ زون سمیت دیگر مختلف علاقے عام ٹریفک کیلئے بند کردئیے گئے۔ پولیس نے شہریوں کو غیر ضروری سفر سے اجتناب کی ہدایت کی ہے۔