سینیٹر رحمان ملک کا انتقال، صدرِ مملکت اور وزیر اعظم کا اظہارِ تعزیت

اسلام آباد: صدرِ مملکت ڈاکٹر عارف علوی اور وزیر اعظم عمران خان نے پیپلز پارٹی کے سینئر رہنما، سابق وزیر داخلہ اور سینیٹر رحمان ملک کے انتقال پر تعزیت کا اظہار کیا ہے۔

سماجی رابطے کی ویب سائٹ ٹوئٹر پر صدرِ پاکستان کے آفیشل ٹوئٹر اکاؤنٹ سے جاری کردہ پیغام کے مطابق صدرِ مملکت ڈاکٹر عارف علوی نے سابق وزیر داخلہ رحمان ملک کے انتقال پر افسوس کا اظہار کیا ہے۔

یہ بھی پڑھیں:

سابق وزیر داخلہ رحمان ملک علالت کے باعث انتقال کر گئے

ٹوئٹر پیغام کے مطابق صدرِ مملکت ڈاکٹر عارف علوی نے پی پی پی سینیٹر کی وفات پر گہرے رنج و غم کا اظہار کرتے ہوئے رحمان ملک کے اہلِ خانہ سے ہمدردی کا اظہار اور مرحوم کیلئے دُعائے مغفرت کی۔

صدر مملکت ڈاکٹر عارف علوی کا سابق وزیر داخلہ رحمٰن ملک کے اِنتقال پر اظہارِ افسوس

صدر مملکت كا وفات پر گہرے رنج و غم کا اظہار

صدر ڈاکٹر عارف علوی کا رحمٰن ملک کے اہل خانہ سے اظہار ہمدردی

صدر مملکت کی مرحوم کیلئے دعائے مغفرت، لواحقین کیلئے صبر جمیل کی دعا#RehmanMalik

— The President of Pakistan (@PresOfPakistan) February 23, 2022

دوسری جانب وزیر اعظم عمران خان نے بھی سینیٹر رحمان ملک کے انتقال پر افسوس کا اظہار کرتے ہوئے کہا کہ اللہ تعالیٰ مرحوم کی مغفرت اور سوگواران کو صبرِ جمیل عطا فرمائے۔ 

خیال رہے کہ اس سے قبل سابق وفاقی وزیرِ داخلہ رحمان ملک علالت کے باعث انتقال کر گئے۔ پیپلز پارٹی کے سینیٹر رحمان ملک اسلام آباد کے پرائیویٹ ہسپتال میں زیر علاج تھے۔

 سینیٹر رحمان ملک کا کورونا ٹیسٹ کا نتیجہ مثبت نکلا تھا۔ گزشتہ کچھ دنوں سے وائرس کے باعث پیپلز پارٹی کے سینئر مرکزی رہنما رحمان ملک کے پھیپھڑے متاثر ہوئے۔

رحمان ملک نے 25 مارچ 2008 سے 16 مارچ 2013 تک وزیر داخلہ کی حیثیت سے ملک و قوم کی خدمت کی۔ اپوزیشن رہنما کی حیثیت سے انہوں نے میثاقِ جمہوریت میں اہم کردار ادا کیا۔