ضلع شرقی :مفرور اور غیر حاضر تدریسی و غیر تدریسی عملے کی برطرفی کی سفارش

کراچی :ڈپٹی کمشنر ایسٹ آصف جان صدیقی نے مفرور اور عادی غیر حاضر 3سو سے زائد تدریسی اور غیر تدریسی عملے کے خلاف کارروائی کرنے کا فیصلہ کرلیا ،ملازمت سے ہٹانے کے حوالے سے محکمانہ کارروائی کی سفارش کردی گئی۔

ڈپٹی کمشنر کراچی ایسٹ آصف جان صدیقی کی زیر صدارت ڈسٹرکٹ سروس ڈیلوری کمیٹی کا اجلاس منعقد ہوا۔ اجلا س میں ایڈیشنل ڈپٹی کمشنر II محمد اسحاق گاد، چیف مانیٹرنگ آفیسر کے علاوہ دیگر کمیٹی ممبران اور ڈسٹرکٹ ایجوکیشن آفیسرز سکینڈری اور پرائمری نے شرکت کی۔

اجلاس میں چیف مانیٹرنگ آفیسر مانیٹرنگ اینڈ ایولیشن حنا حمید سانگی نے ڈپٹی کمشنر ڈسٹرکٹ ایسٹ آصف جان صدیقی کو ڈسٹرکٹ کے مفرور اور عادی غیر حاضر رہنے والوں کے حوالے سے تادیبی کارروائی کے بارے میں مکمل بریفنگ دی اور اپنی رپورٹ سے آگاہ کیا۔

رپورٹ میں بتایا گیا ہے کہ 2019سے 2021ء تک تقریباً تین سو سے زائد اساتذہ و غیر تدریسی عملہ مفرور یا غیر حاضر ہے۔ محکمہ اسکول ایجوکیشن اور لٹریسی کے 43 مفرور و عادی غیر حاضر تدریسی اور غیر تدریسی عملے کو ملازمت سے فوری ہٹانے کی سفارش کی گئی ہے جن میں سے 2 غیر حاضر رہنے پر تادیبی کارروائی کے بعد جبری ریٹائرمنٹ دے دی گئی ہے۔

مزید پڑھیں:جامعہ معھد الخلیل میں 292 طلباءوطالبات کی ختم بخاری 30 جنوری کو ہو گی

اجلاس کے دوران 92مفرور اور 261تدریسی اور غیر تدریسی عملے کو عادی غیر حاضر عملہ قرار دے دیا گیا ہے اور ڈپٹی کمشنر آصف جان صدیقی نے بطور چیئرمین نے قواعد و ضوابط اور پالیسی کے مطابق ان کے خلاف تادیبی اور محکمہ جاتی کارروائی کو تیز کرنے کے احکامات دے دئیے ہیں۔

چیف مانیٹرنگ آٖفیسر مانیٹرنگ اینڈ ایولیشن حنا حمید سانگی کی رپورٹ میں تدریسی اور غیر تدریسی عملے کے 43 سیکنڈری و پرائمری کے ملازمین کو نوکری سے برخاست کرنے کی سفارش کی گئی ہے۔

اِن میں 4ہائر اسکول ٹیچرز گورنمنٹ بوائز ہائر سکینڈری اسکول پی ای سی ایچ ایس نمبر ۱، 1گورنمنٹ بوائز ہائر سکینڈری اسکول عرفان، گورنمنٹ گرلز ہائر سکینڈری اسکول جونیئر ماڈل، گورنمنٹ گرلز ہائر سکینڈری اسکول جٹ لائن نمبر 2 کے علاوہ 5جونیئر اسکول ٹیچرز گورنمنٹ بوائز ایلیمنٹری اسکول فیض عام، گورنمنٹ گرلز ہائر سکینڈری اسکول چنیسر گوٹھ، گورنمنٹ گرلز ہائر سکینڈری اسکول پی آئی بی اور گورنمنٹ گرلز ہائر سکینڈری اسکول بی وائی جے شامل ہیں جبکہ گورنمنٹ بوائز ہائر سکینڈری اسکول کورکس کا ایس ایل ٹی ٹیچر کو بھی ہٹانے کی سفارش کی گئی ہے۔

اس کے علاوہ 3پرائمری اسکول ٹیچرز میں گورنمنٹ بوائز ہائر سیکنڈری اسکول نو ر اسلام، گورنمنٹ بوائز ہائر سکینڈری اسکول تعمیر ملت 3پرائمری اسکول ٹیچرز بھی ہیں جبکہ پرائمری اسکول کے 3جونیئر کلرکس اور 4لیب اسسٹنٹ اور لیب اٹینڈنٹ، 1مالی، 2نائب قاصد، 1چوکیدرار اور 1سوئپر شامل ہے جن کو نوکریوں سے برخاست کرنے کی سفارش کی گئی ہے۔