انٹر بورڈ بارہویں سائنس جنرل کے 95 فیصد طلبہ کامیاب

کراچی : اعلیٰ ثانوی تعلیمی بورڈ کراچی کے چیئرمین پروفیسر ڈاکٹر سعید الدین نے انٹرمیڈیٹ بارہویں کلاس سائنس جنرل گروپ کے سالانہ امتحانات برائے 2021ء کے نتائج کا اعلان کر دیا ہے۔

چیئرمین انٹربورڈ پروفیسر ڈاکٹر سعید الدین نے نتائج کی تفصیلات بتاتے ہوئے کہا کہ سائنس جنرل گروپ کے امتحانات میں 3759 امیدواروں نے رجسٹریشن حاصل کی، 3738 امیدوار امتحانات میں شریک ہوئے جبکہ 3564 امیدوار کامیاب قرار پائے ۔ اس طرح کامیابی کا تناسب 95اعشاریہ 35 فیصد رہا۔

چیئرمین انٹربور ڈ نے مزید بتایا کہ ان امتحانات میں 498 امیدوار اے ون گریڈ، 494 اے گریڈ، 778 بی گریڈ، 958 سی گریڈ، 737 ڈی گریڈ اور 99 امیدوار ای گریڈ میں کامیاب ہوئے۔

اس سے قبل میٹرک بورڈ نے کراچی میں میٹرک امتحان کے نتائج کا اعلان کیاتھا، اس سال 148940 طلباء و طالبات امتحانات میں شریک ہوئے،146677 بچے کامیاب ہوئے، کامیابی کا تناسب 98اعشاریہ 48 فیصد رہا۔

مزید پڑھیں:کراچی میں میٹرک امتحان کے نتائج کا اعلان ،146677 طلبہ کامیاب

سائنس گروپ میں 156287 طلباء و طالبات رجسٹر ڈ ہوئے جن میں سے 148940 طلباء و طالبات امتحانات میں شریک ہوئے جبکہ دونوں پرچوں میں غیر حاضر طلباء وطالبات کی تعداد 2263 اور صرف ایک پرچے میں غیر حاضر طلباء وطالبات کی تعداد 7347 رہی۔

امتحانات میں شامل ہونے والوں میں 84945طلباء اور 71342 طالبات شامل ہیں۔ کامیابی کا تناسب 98.48 فیصد رہا، کامیاب طلباء و طالبات میں سے 41476 نے اے ون گریڈ، 24977 نے اے گریڈ، 23754 نے Bگریڈ، 23213 نے Cگریڈ، 22444 نے D گریڈ اور 10204 نے E گریڈ حاصل کیا۔