رینجرز اور پولیس کی کارروائیاں، 5انتہائی مطلوب ملزمان گرفتار

کراچی:پاکستان رینجرز اور پولیس نے انٹیلی جنس معلومات کی بنیاد پر کراچی کے علاقے پرانا گولیمار اور ملیر میں مشترکہ کارروائی کرتے ہوئے منشیات فروشی، ٹارگٹ کلنگ، بھتہ خوری اور ڈکیتی کی وارداتوں میں ملوث انتہائی مطلوب 5ملزمان محمد عامر عرف موٹا، ارسلان عرف مٹھو، رحمن، محمد حمزہ اور دانیال کو گرفتار کرلیا،ملزمان کے قبضے سے اسلحہ و ایمونیشن بھی بر آمد کر لیا گیا۔

دوران تفتیش ملزمان نے انکشاف کیا کہ وہ 2016 سے پرانا گولیمار میں بدنام زمانہ منشیات فروش کاشف ڈاڈ اکے منشیات کے اڈے پر کا م کر رہے تھے۔ ملزمان نے مزید انکشاف کیا کہ وہ منشیات فروشی کے علاوہ پرانا گولیمار میں واقع ماربل مارکیٹ، آٹو گیراج ہوٹل اور مختلف دکانوں سے 10 تا15 ہزار روپے ماہانہ بھتہ وصول کرتے تھے۔

مزید پڑھیں:اقرار الحسن نے ڈیل کرلی، پروگرام نہیں چلا، خاتون کے معروف اینکر پر الزامات

ملزمان بھتہ خوری کے علاوہ مخالف منشیات فروخت کرنے والے افراد پر فائرنگ کرکے انھیں قتل اور زخمی کرنے میں ملوث رہے ہیں۔ مورخہ 28 اگست 2021کو پرانا گولیمار کے علاقے میں خوف وہراس پھیلانے کے لیے شدید فائرنگ کی جس کے نتیجے میں آصف علی نامی شخص زخمی ہوا تھا۔

ملزمان پرانا گولیمار، صدر، لسبیلہ، ناظم آباد، لیاقت آباد اور لالوکھیت کے علاقہ میں 300سے زائد چوری، ڈکیتی اور موبائل فون چھیننے کی وارداتوں میں ملوث رہے ہیں۔

ملزمان اس سے قبل متعدد بار پولیس اور رینجرز کے ہاتھوں گرفتار ہو کر جیل جا چکے ہیں اور رہا ہونے پر منشیات فروشی، بھتہ خوری اور چوری ڈکیتی کی وارداتیں دوبارہ شروع کر دیتے ہیں۔

ملزمان کے دیگر سا تھیوں کی گر فتاری کے لیے چھا پے مارے جا رہے ہیں۔ گرفتار ملزمان کوبمعہ اسلحہ وایمونیشن مزیدقانونی کاروائی کے لیے پولیس کے حوالے کردیا گیا ہے۔