ملک بھر میں 24 گھنٹوں کے دوران مزید 219 افراد میں ڈینگی کی تصدیق

ملک بھر میں ڈینگی وائرس نے ایک بار پھر عوام کو متاثر کرنا شروع کردیا، گزشتہ 24 گھنٹوں کے دوران پاکستان بھر میں مزید 219 افراد میں ڈینگی وائرس کی تصدیق ہوچکی ہے۔

رواں سال ملک بھر میں ڈینگی کے 50 ہزار سے زائد کیسز رپورٹ ہوئے جبکہ اسلام آباد سے رواں سال 13 ہزار 200 کیسز دیکھنے میں آئے۔

سب سے زیادہ صوبہ سندھ ڈینگی وائرس سے متاثر ہوا جہاں 13 ہزار 622 افراد کے اجسام میں ڈینگی کیسز کی رپورٹ ہوئی جبکہ پنجاب سے 9 ہزار 890، بلوچستان سے 3 ہزار 217، خیبر پختونخواہ سے 7 ہزار 21 جبکہ قبائلی اضلاع سے 780 کیس رپورٹ ہوئے۔

آزاد کشمیر سے رواں سال 1 ہزار 691 ڈینگی کیسز رپورٹ ہوئے جبکہ گلگت بلتستان سے ایسی کوئی اطلاع موصول نہیں ہوئی۔ موجودہ سال کے دوران ڈینگی کے نتیجے میں 80 افراد جان کی بازی ہار گئے۔

رواں سال کے دوران اب تک سندھ میں ڈینگی کے باعث 34 ، پنجاب میں 20، بلوچستان میں 3، اسلام آباد میں 22 جبکہ آزاد کشمیر میں 1 شخص جاں بحق ہوا۔

یاد رہے کہ اس سے قبل کراچی میں ڈینگی ایک اور زندگی نگل گیا، اورنگی ٹاؤن کا رہائشی 3 سالہ بچہ عباسی شہید ہسپتال میں دم توڑ گیا، رواں برس ڈینگی سے مرنے والوں کی تعداد 34 ہوگئی۔

 ڈینگی سے متاثرہ اورنگی ٹاون کے رہائشی تین سالہ بچے کو11 نومبر کو تیز بخار کی حالت میں ہسپتال لایا گیا تھا۔ کراچی میں ڈینگی سے مزید 254 افراد متاثر ہوگئے۔رواں مہینے کراچی میں ڈینگی سے دوہزار سے زائد افراد متاثر ہوئے۔

مزید پڑھیں: کراچی میں  رواں برس مرنے والوں کی تعداد 34ہوگئی