گوگل نیوز پر ہمیں فالو کریںبہاولپور / راولپنڈی: بھارت کے بزدلانہ میزائل حملے کے نتیجے میں بہاولپور میں شہداء کی تعداد 13 ہوگئی ہے، جن میں ایک بچہ بھی شامل ہے۔
وکٹوریہ اسپتال بہاولپور کے میڈیکل سپرنٹنڈنٹ نے اس افسوسناک اطلاع کی تصدیق کی ہے۔ بھارتی میزائل براہ راست سبحان مسجد کو نشانہ بنا گیا جس کے نتیجے میں مسجد شدید متاثر ہوئی اور کئی افراد زخمی بھی ہوئے۔
آئی ایس پی آر کے مطابق بھارتی افواج نے منگل کی شب پاکستان کی فضائی حدود کی خلاف ورزی کیے بغیر، اپنی فضاء سے میزائل فائر کیے جنہوں نے مظفرآباد، کوٹلی، بہاولپور اور مریدکے میں تباہی مچائی۔
پاک فضائیہ کو ہائی الرٹ پر رکھا گیا ہے اور جوابی کارروائیاں بھرپور قوت کے ساتھ جاری ہیں۔
ڈی جی آئی ایس پی آر لیفٹیننٹ جنرل احمد شریف نے کہا ہے کہ “پاکستان دشمن کی وقتی خوشی کو مستقل ماتم میں بدل دے گا”۔
ان کا کہنا تھا کہ بھارت کے اس بزدلانہ اقدام کا جواب دینا پاکستان کا قومی فریضہ ہے اور افواج پاکستان پوری طرح مستعد اور جوابی کارروائی کے لیے مکمل تیار ہیں۔
واضح رہے کہ 22 اپریل کو مقبوضہ جموں و کشمیر کے علاقے پہلگام میں ایک دہشتگرد حملے میں 26 افراد جاں بحق ہوئے تھے جس کا الزام بھارت نے فوری طور پر پاکستان پر لگا دیا تھا حالانکہ پاکستان نے نہ صرف اس الزام کی سختی سے تردید کی بلکہ ایک غیر جانبدار بین الاقوامی تحقیقات کی پیشکش بھی کی۔
بھارت کی مسلسل اشتعال انگیزیوں اور بے بنیاد الزامات کے باعث خطے میں جنگ کے بادل منڈلا رہے ہیں۔ وزیراعظم شہباز شریف اور سروسز چیفس کو بھی موجودہ صورتحال اور فوجی تیاریوں پر بریفنگ دی گئی ہے۔
