گوگل نیوز پر ہمیں فالو کریںمقبوضہ جموں و کشمیر میں غاصب بھارت کی طرف سے نافذ کرفیو آج 120ویں روز میں داخل ہوگیا ہے ، جبکہ ذرائع مواصلات کی مسلسل بندش کے باعث کاروبارِ زندگی مفلوج ہو کر رہ گیا ہے۔
شدید سردی اور برف باری کے باعث نظامِ زندگی مفلوج ہے اور مظلوم کشمیریوں پر عرصۂ حیات تنگ ہوچکا ہے۔خوراک اور زندگی بچانے والی ادویات کی عدم دستیابی اور ہسپتالوں میں مریضوں کے عدم علاج کے باعث مظلوم کشمیریوں کی شہادتوں کا سلسلہ ہر روز جاری ہے۔
کشمیر میں انسانی تاریخ کے بد ترین کرفیو کے باعث کاروباری مراکز، تعلیمی ادارے اور دکانیں وغیرہ بند ہیں جبکہ وادی میں ہزاروں افراد کاروبار کی مسلسل بندش کے نتیجے میں بے روزگار ہوچکے ہیں۔
دُنیا کی سب سے بڑی جمہوریت کہلانے والے بھارت نے مقبوضہ کشمیر میں دکانیں، کاروبار اور تعلیمی مراکز کھولنے پر پابندی عائد کررکھی ہے جبکہ مسلسل کرفیو کے دوران عوام اپنے گھروں میں محصور ہیں۔
سرچ آپریشن کے نام پر بھارتی فوج نہتے کشمیری نوجوانوں، بچوں اور خواتین کو تشدد کا نشانہ بناتی ہے اور ہر روز مسلسل کشمیری عوام بالخصوص نوجوانوں کو شہید کیا جاتا ہے۔
اس کے علاوہ کشمیری نوجوانوں، حریت رہنماؤں اور بھارت نواز سیاستدانوں کو بھی قابض بھارتی فوج نے بڑی تعداد میں گرفتار کرکے یا تو جیلوں میں ڈال دیا ہے یا انہیں نظر بند کردیا گیا ہے۔
موبائل فون، انٹرنیٹ اور ٹی وی سمیت ذرائع مواصلات کے نظام کی معطلی کے باعث کشمیری عوام ایک دوسرے سے رابطہ کرنے سے بھی محروم ہوچکے ہیں اور میڈیا سمیت عالمی برادری کے کسی بھی شعبے کو کشمیر میں ہونے والے جانی و مالی نقصان کی درست تفصیلات کا اندازہ نہیں۔
قابض بھارتی فوج نے کشمیریوں کی زندگی اجیرن بنا رکھی ہے، ٹرانسپورٹ سہولیات کی عدم دستیابی کے باعث لوگ ایک جگہ سے دوسری جگہ آجا نہیں سکتے، جبکہ اشیائے ضروریہ کی شدید قلت کے باعث قحط کی سی صورتحال پیدا ہوچکی ہے۔
یاد رہے کہ اس سے قبل ماہِ نومبر کے دوران مقبوضہ جموں و کشمیر میں کم از کم 7 افراد کو شہید کیا گیا، جبکہ 60 سے زائد افراد کو گرفتار کر لیا گیا جن میں کشمیری نوجوان اور حریت رہنما شامل ہیں۔
نومبر کے دوران کشمیر میڈیا سروس کے مطابق غاصب بھارتی فوج نے پر امن مظاہرین پر پیلٹ گنز کا استعمال کرکے متعدد افراد کو بینائی سے محروم کردیا جبکہ فائرنگ کرکے کم از کم 82 افراد کو شدید زخمی کیا گیا۔
مزید پڑھیں: گزشتہ ماہ کے دوران کشمیر میں 7 افراد شہید، 60 گرفتار
