سیکورٹی فورسز کا شمالی وزیرستان میں آپریشن، ایک دہشت گرد ہلاک،اسلحہ اور گولہ بارود برآمد

پشاور: سیکورٹی فورسز کے شمالی وزیرستان کے ضلع اسپن وام میں آپریشن کے دوران ایک دہشت گرد مارا گیا، اسلحہ اور گولہ بارود برآمدکرلیا گیا۔

آئی ایس پی آر کے مطابق آپریشن دہشت گردوں کی موجودگی کی اطلاع پر سیکورٹی فورسز نے شمالی وزیرستان کے ضلع اسپن وام میں آپریشن کیا۔فائرنگ کے تبادلے میں ایک دہشت گرد ہلاک ہوا جبکہ بڑی تعداد میں اسلحہ اور گولہ بارود برآمدکیاگیا۔

دہشت گرد سیکورٹی فورسز کیخلاف کارروائیوں میں ملوث تھا، مقامی آبادی نے فورسز کے آپریشن کو سراہا اورعلاقے سے دہشت گردی کی لعنت کے خاتمے کیلئے بھرپور تعاون کا اظہارکیا ہے۔

مزید پڑھیں:کوئٹہ میں نامعلوم افراد کی بلا اشتعال فائرنگ، 2 پولیس اہلکار جاں بحق

یاد رہے کہ سیکورٹی فورسز نے شمالی وزیرستان کے علاقے ماڑی خیل میں گزشتہ روزخفیہ اطلاعات کی بنیاد پرآپریشن کیا، اس آپریشن کے دوران سیکورٹی فورسز نے بھاری تعداد میں اسلحہ،ہتھیار اور گولہ بارود برآمد کیا۔

آئی ایس پی آر نے بتایا تھا کہ سیکورٹی فورسز نے علاقے میں اسلحہ اور گولہ بارود کے ذخیرے کی موجودگی کی اطلاع پر آئی بی او کی کارروائی کی، تلاشی کے دوران برآمد ہونے والے ہتھیاروں اور گولہ بارود میں سب مشین گنز، لائٹ مشین گنز شامل ہیں جبکہ راکٹ پروپلڈ گرنیڈ، سیکڑوں راکٹ، دستی بم اور گولیاں بھی برآمد ہوئیں۔