سلمان رشدی پر قاتلانہ حملہ کرنیوالے کا بیان سامنے آگیا

نیویارک: سلمان رشدی پر نیویارک میں قاتلانہ حملہ کرنے والے ملزم ہادی مطر نے ایران سے تعلق کی تردید کردی۔

تفصیلات کے مطابق غیر ملکی میڈیا کا کہنا ہے کہ ملزم ہادی مطر نے کہا کہ سلمان رشدی کے ناول کے کچھ صفحات پڑھے ہیں، اُس نے اسلام اور اُس کے عقائد پرحملہ کیا۔

قبل ازیں امریکا میں سلمان رشدی پر ہونے والے حملے سے متعلق ایران کا ردعمل سامنے آیا تھا۔

ترجمان ایرانی وزارت خارجہ نے کہا تھا کہ سلمان رشدی پر حملے سے کسی بھی قسم کے تعلق کی تردید کرتے ہیں، کسی کو بھی اسلامی جمہوریہ ایران پر الزام عائد کرنے کا حق نہیں ہے۔

یہ بھی پڑھیں:

ہماری بربریت دیکھ کر مہذب دنیا پر سکتہ طاری ہوگا، شہباز گل کی حالت پر عمران خان کا ردعمل

واضح رہے کہ سلمان رشدی پر گزشتہ ہفتے نیویارک میں ایک تقریب کے دوران چاقو سے حملہ کیا گیا تھا، جس کے بعد اُسے تشویشناک حالت میں اسپتال منتقل کیا گیا۔

پولیس نے سلمان رشدی پر حملے کے الزام میں 24 سالہ نوجوان ہادی مطر کو گرفتار کیا تھا۔

سلمان رشدی کو توہین آمیز تصنیف کی وجہ سے ماضی میں بھی قتل کی دھمکیاں ملتی رہی ہیں اور 1988 میں اس معاملے پر برطانیہ سمیت دنیا بھر میں مظاہرے ہوئے تھے۔

خیال رہے کہ پاکستان نے سلمان رشدی کی گستاخانہ کتاب پر پابندی عائد کردی تھی جب کہ ایران کے آیت اللہ خمینی نے 1989 میں رشدی کو واجب القتل قرار دینے کا فتویٰ دیا تھا۔