کراچی میں سیکورٹی غیر تربیت یافتہ گارڈز کے حوالے، فورسز نے چیکنگ شروع کردی

کراچی: پاکستان رینجرز (سندھ) اور پولیس کا کراچی بھر میں غیرقانونی سیکورٹی گارڈز کے خلاف کریک ڈاؤن۔ کراچی میں اہم تنصیبات اور گھروں پر تعینات سیکیورٹی گارڈز کا ریکارڈ چیک کیا گیا۔

چیکنگ کے ابتدائی مرحلے کے دوران سیکیورٹی گارڈز کی بڑی تعداد غیرتربیت یافتہ گارڈز پر مشتمل پائی گئی، جس پر سیکورٹی کمپنیز کو ہدایات جاری کی گئیں۔

دوسرے مرحلے میں کراچی کے چار اضلاع میں مجموعی طور پر 4661 سیکورٹی گارڈز کا ریکارڈ چیک کیا گیا۔ مشتبہ سیکیورٹی گارڈز کی کرائم رپورٹنگ انڈکس سسٹم کے تحت ویری فکیشن کی گئی۔

دوران اسلحہ ویری فکیشن 337 گارڈز کا اسلحہ غیر تصدیق شدہ جبکہ 159 گارڈز کا اسلحہ غیر لائسنس یافتہ پایا گیا۔ سیکورٹی کمپنیز سے غیر لائسنس یافتہ اسلحے کا ریکارڈ طلب کر لیا گیا ہے۔

دوسری جانب پاکستان رینجرز (سندھ) اور سندھ پولیس کی جانب سے جرائم کی روک تھام کیلئے کراچی کے مختلف علاقوں میں مشترکہ اسنیپ چیکنگ کا آغاز کیا گیا۔ اسنیپ چیکنگ کے دوران ٹریفک قوانین کی خلاف ورزی میں ملوث افراد کے خلاف کارروائی عمل میں لائی گئی۔

اسنیپ چیکنگ میں ایک ہفتہ کے دوران مجموعی طور پر 17408 گاڑیوں کو چیک کیا گیا، 222 گاڑیوں پر غیرقانونی ایمرجنسی لائیٹس، 1363 گاڑیوں پر فینسی لائیٹس اور سائرن اور 3003 گاڑیوں پر لگے کالے شیشے ہٹوائے گئے۔

پولیس حکام کے مطابق 177 افراد کے خلاف بغیر اجازت کے گاڑی کے کیبن میں بیٹھ کر اسلحہ کی نمائش کرنے پر کارروائی عمل میں لائی گئی اور 4643 گاڑیوں کے قوانین کی خلاف ورزی پر چالان بھی کیے گئے۔

یہ بھی پڑھیں : پاکستان کسٹمز کا انٹرنیشنل میل آفس پر چھاپہ، 1 کروڑ روپے سے زائد مالیت کے قیمتی پتھر برآمد