پاکستان اسٹاک ایکسچینج نے جی ای ایم بورڈ میں پہلی کمپنی کی لسٹنگ کامیابی سے مکمل کرلی

کراچی:پاکستان اسٹاک ایکسچینج میں ہونے والی ایک تاریخی ڈیولپمنٹ کے تحت، پاک ایگرو پیکیجنگ لمیٹڈ ، پی ایس ایکس کے گروتھ انٹرپرائز مارکیٹ بورڈ میں درج ہونے والی پہلی کمپنی بن گئی ہے۔

جی ای ایم بورڈ ایک لسٹنگ پلیٹ فارم ہے جو ترقی پذیر انٹر پرائزز، چاہے وہ چھوٹے، درمیانے یا گرین فیلڈ بزنس کی صورت میں ہوں،انھیں سہولت کی فراہمی اور کاروباری سرمایہ بڑھانے کی ضروریات کے لیے بنایا گیا ہے۔وزیر اعظم کے مشیر برائے خزانہ اورریونیو شوکت ترین اس گونگ تقریب کے مہمان خصوصی تھے۔

تقریب میں چیئرمین ایس ای سی پی عامر خان، چیئرپرسن پی ایس ایکس، ڈاکٹر شمشاد اختر؛ ایم ڈی اور سی ای او پی ایس ایکس، فرخ ایچ خان؛ پی ایس ایکس کے بورڈ ممبران؛ سی ای او پاک ایگرو پیکیجنگ لمیٹڈ، خالد بٹ؛ سی ای او اے کے ڈی سیکیورٹیز لمیٹڈ، فرید عالم؛ کے علاوہ پی ایس ایکس، ایس ای سی پی، پاک ایگرو پیکیجنگ لمیٹڈ اور اے کے ڈی سیکیورٹیز لمیٹڈ سمیت شرکت کرنے والی تنظیموں کی اعلیٰ انتظامیہ نے بھی شرکت کی۔

پاک ایگرو پیکیجنگ لمیٹڈ نے پی ایس ایکس، جی ای ایم بورڈ کی لسٹنگ کے ذریعے 180 ملین روپے اکٹھا کرنے کا تخمینہ لگایا تھا۔

پاک ایگرو پیکیجنگ لمیٹڈ کا اِیشو 8,000,000 عام شیئرز پر مشتمل تھا جس میں کمپنی کے پوسٹ-اِیشو کے پیڈ -اپ کیپٹل کا 40 فیصد شامل تھا۔ یہ پورا اِیشو بُک بلڈنگ کے عمل کے ذریعے 22.50 روپے فی شیئر کی فلور پرائس پر پیش کیا گیا تھا۔

24.75 روپے فی حصص کی اسٹرائیک قیمت پر 366,453,573 روپے (یا 14.79 ملین شیئرز) موصول ہونے والی کُل بولیوں کے سلسلے میں جمع کی گئی رقم 198,000,000 روپے تھی، اس طرح اِیشو کو 1.85x بار اوور سبسکرائب کیا گیا۔

سرمایہ کاروں کی بڑی تعداد نے بُک بلڈنگ کے عمل میں حصہ لیا اور 106 بولی دہندگان میں سے 69 سرمایہ کاروں کو کامیاب قرار پائے۔

اس موقع پر وزیر اعظم کے مشیر برائے خزانہ اورریونیو، شوکت ترین کا، جی ای ایم بورڈ میں پہلی کمپنی کی شمولیت کو خوش آئند قرار دیتے ہوئے کہنا تھا کہ، ”جیسا کہ ہم جی ای ایم بورڈ میں پہلی لسٹنگ کی خوشی منا رہے ہیں، میں نہ صرف پاک ایگرو پیکیجنگ لمیٹڈ کی انتظامیہ کو مبارکباد دیتا ہوں بلکہ بورڈ ممبران اور پاکستان اسٹاک ایکسچینج کی انتظامیہ اور سیکیورٹیز اینڈ ایکسچینج کمیشن آف پاکستان کو بھی مبارکباد پیش کرتا ہوں جنھوں نے اس خواب کو حقیقت میں بدلنے کے لیے بے انتہا محنت کی ہے۔ میں ایس ایم ایز کو مشورہ دوں گا کہ وہ اسٹاک ایکسچینج کے ذریعے سرمایہ اکٹھا کرنے کے اس موقع سے فائدہ اٹھانے کے لیے آگے آئیں۔“

ٹیکس مراعات کو معقول بنانے کے حوالے سے ایم ڈی پی ایس ایکس کی بات کا جواب دیتے ہوئے شوکت ترین کا کہنا تھا کہ، ”ہمیں ٹیکس مراعات کو بالکل معقول بنانا ہوگا تاکہ پاکستان کے پیداواری شعبے میں سرمایہ کاری میں اضافہ ہو سکے۔

ہم اس ملک میں پیداواری شعبوں میں سرمایہ کاری دیکھنا چاہتے ہیں۔ اگرچہ میں رئیل اسٹیٹ سیکٹر کے خلاف نہیں ہوں کیونکہ یہ معیشت کو فائدہ پہنچاتا ہے اور تقریباً 40 دیگر صنعتوں کو سپورٹ کرتا ہے اور ساتھ ہی ساتھ روزگار بھی پیدا کرتا ہے، تاہم ہمیں اس بات کو یقینی بنانا ہوگا کہ رئیل اسٹیٹ سیکٹر کو ملنے والے فوائد معیشت کے ساتھ ساتھ اس کے دوسرے پیداواری شعبوں کے لیے موافق ہوں۔

ہم رئیل اسٹیٹ سیکٹر میں اس وقت ایک بے ضابطگی دیکھتے ہیں جب زمین کے پلاٹ خریدے جاتے ہیں اور سالوں تک رکھے جاتے ہیں۔ یہ پیداواری سرمایہ ڈوبنے کے مترادف ہے۔

اس حوالے سے، میں یہ اعلان کرنا چاہتا ہوں کہ ہم ٹیکسوں کی کچھ اسکیم متعارف کرائیں گے جو ان اثاثوں پر لاگو ہوں گے تاکہ رقم کو معیشت کے دیگر شعبوں میں بھی ری سائیکل کیا جاسکے۔ ہم REIT لسٹنگ کی بھی منظوری دے رہے ہیں جس سے کیپٹل مارکیٹ کو فائدہ پہنچے گا۔

مزید یہ کہ، ہم SOEsکی فہرست سازی کے حق میں ہیں جو اس وقت گردشی قرضوں کے رجحان سے متاثر ہیں۔ اس نے ہمارے پبلک سیکٹر، خاص طور پر توانائی کے شعبے میں کچھ اداروں کا گلا گھونٹ دیا ہے۔ تاہم، ہم اسے بحال کرنے کے لیے سرگرم عمل ہیں۔ لسٹڈ ڈومین میں پیٹرولیم اور کچھ پاور کمپنیوں کو تھوڑی سرگرمی کا موقع ملے گا اور اس سے اسٹاک ایکسچینج کو مدد ملے گی کیونکہ ظاہر ہے یہ ہیوی ویٹ کمپنیاں ہیں۔“

انھوں نے مزید کہا کہ، ”ہم آپ کی جانب سے کی گئی محنت کو سراہتے ہیں، اور میں آپ کی تمام کوششوں میں آپ کے ساتھ کھڑا رہوں گا؛ میں ایف بی آر سے بھی مطالبہ کرتا ہوں کہ وہ ضروری مدد فراہم کرے جس کی آپ کو ضرورت ہے اور کمپنیوں کو فہرست میں لانے کی ترغیب دینے کے لیے ٹیکس نظام کا جائزہ لیا جائے“۔

چیئرمین ایس ای سی پی، عامر خان نے کہا کہ، ”ایس ای سی پی نے ہمیشہ ایس ایم ایز کے لیے فنانس تک رسائی کو بہتر بنانے پر توجہ مرکوز کی ہے، اورجی ای ایم بورڈ اسمال انٹرپرائزز، سٹارٹ اپس اور گرین فیلڈ کمپنیوں کو نجی سرمائے تک رسائی حاصل کرنے میں سہولت فراہم کرے گا۔“

پی ایس ایکس کے جی ای ایم بورڈ میں پاک ایگرو پیکیجنگ لمیٹڈ کی کامیاب بُک بلڈنگ اور لسٹنگ کی بابت بات کرتے ہوئے، ایم ڈی پی ایس ایکس، فرخ خان نے کہا کہ، ”میں 2019 میں بورڈ کے آغاز کے بعد سے پاک ایگرو پیکیجنگ لمیٹڈ کو ایکسچینج کے جی ای ایم بورڈ میں درج ہونے والی پہلی کمپنی کی حیثیت سے مبارکباد پیش کرتا ہوں۔

جی ای ایم بورڈ پاکستان کی کیپٹل مارکیٹ میں ایک اہم جدت ہے اور یہ پاکستان میں انتہائی اہم اور متحرک ایس ایم ای سیکٹر کو کم لاگت پر اور آسانی کے ساتھ قرض اور ایکویٹی کیپٹل اکٹھا کرنے کے قابل بنا کر فنانسنگ کی ضروریات کو پورا کرے گا۔

نیا بورڈ پاکستان میں ابتدائی مرحلے کی فنانسنگ کی مکمل ویلیو چین میں بھی مدد کرے گا کیونکہ ایسے سرمایہ کاروں کے پاس اب جی ای ایم بورڈمیں لسٹنگ کے ذریعے ایک قابل عمل ایگزٹ میکانزم ہوگا۔

زرعی سپورٹ پیکیجنگ اورا سٹوریج کی مصنوعات فراہم کرنے میں صنعتی قائد کی حیثیت سے، پاک ایگرو پیکیجنگ لمیٹڈ اب ماہی گیری کے جال تیار کرکے اپنی صنعتی بنیاد کو بڑھانے کے لیے سرمایہ اکٹھا کر رہا ہے۔

مزید پڑھیں:آئی ایم ایف کا مطالبہ مسترد، ٹیکسز نہیں بڑھائیں گے،شوکت ترین

ہمیں بہت خوشی ہے کہ انھوں نے جی ای ایم بورڈ کو اپنی صنعتی صلاحیت کو متنوع بنانے کے ساتھ ساتھ اپنی ورکنگ کیپٹل کی ضروریات کو پورا کرنے کے سلسلے میں سرمایہ اکٹھا کرنے کے لیے استعمال کیا۔“

مزید ان کا کہنا تھا کہ، ”پاکستان اسٹاک ایکسچینج پاکستان کے ایس ایم ای سیکٹر کو کیپٹل مارکیٹ کے ذریعے ان کی مالی ضروریات کو پورا کرنے میں سہولت فراہم کرنے کے لیے تندہی سے کام کر رہی ہے۔

ہم اس کوشش میں رہنمائی اور تعاون پر ایس ای سی پی اور وزارت خزانہ کے شکر گزار ہیں۔ ہم پُر اعتماد ہیں کہ یہ پاکستان کے ایس ایم ای سیکٹر کے لیے سرمایہ حاصل کرنے کا ایک اہم ذریعہ بن جائے گا۔“

پی ایس ایکس کے جی ای ایم بورڈ پر پاک ایگرو پیکیجنگ لمیٹڈ کی کامیاب لسٹنگ کے بارے میں بات کرتے ہوئے، کمپنی کے چیئرمین ڈاکٹر صفدر علی بٹ نے اپنے ویڈیو پیغام میں کہا کہ، ”میں پاکستان اسٹاک ایکسچینج، ایس ای سی پی، ہمارے کنسلٹنٹس، اے کے ڈی سیکیورٹیز لمیٹڈ اور ان تمام اداروں کو کو مبارکباد پیش کرنا چاہتا ہوں جنھوں نے پاکستان اسٹاک ایکسچینج کے جی ای ایم بورڈ کے ذریعے اس ملک کے ایس ایم ایز کے لیے ایکویٹی کیپٹل تک رسائی حاصل کرنے کے دروازے کھولنے میں اہم کردار ادا کیا ہے۔”

ان کا مزید کہنا تھا کہ، ”ایس ایم ایز کے ایک رسکی پروپوزیشن ہونے کے بارے میں عام غلط فہمیوں کے باوجود باخبر اور سمجھدار سرمایہ کاروں، خاص طور پر ادارہ جاتی سرمایہ کاروں نے، ایس ایم ایز کے روشن اور ممکنہ طور پر تابناک مستقبل کے پیش نظر سرمایہ کاری کرنے سے خود کو نہیں روکا ہے۔“

اپنے پیغام میں،اے کے ڈی گروپ کے چیئرمین عقیل ڈھیڈ ی نے کہا کہ، ”جی ای ایم بورڈ میں پہلی لسٹنگ نے ایس ایم ایز کی ایکویٹی کیپٹل تک رسائی کی راہ ہموار کی ہے اور سرمایہ کاروں کے لیے ترقی پسند اداروں کے ارتقا میں حصہ لینے کا موقع فراہم کیا ہے۔“

اے کے ڈی سیکیورٹیز لمیٹڈ کے سی ای او فرید عالم نے کہا کہ، ”ایس ایم ایز کسی بھی ترقی پذیر معیشت میں ریڑھ کی ہڈی کی حیثیت رکھتے ہیں۔ ترقی کے جس راستے پر ہم نے بحیثیت قوم سفر شروع کیا ہے، اس کے لیے اقتصادی ویلیو چین کے تمام شرکا کے تعاون کی ضرورت ہے۔

جی ای ایم بورڈ متعارف کروا کر، ایس ای سی پی اورپی ایس ایکس نے مالیاتی شعبے کے اداروں کی مدد سے، ایس ایم ایز کو طویل مدتی ترقی کے لیے اس ضروری سرمائے تک رسائی کا راستہ فراہم کیا ہے۔ ہمیں پہلی بار جی ایم ای کی لسٹنگ کا حصہ بننے اور طویل مدتی ترقی کے لیے ایک کیٹالسٹ ہونے پر خوشی ہے۔“

اے کے ڈی سیکیورٹیز لمیٹڈ میں انویسٹمنٹ بینکنگ کے سربراہ، سید خرم شاہد نے کہا کہ، ”پی ایس ایکس، جی ای ایم بورڈ میں پی اے پی ایل کی افتتاحی لسٹنگ اے کے ڈی سیکیورٹیز لمیٹڈ کے ذریعے عمل میں لائی گئی، یہ مالیاتی ماحولیاتی نظام کی ترقی میں رہنمائی کرنے اور چھوٹے اور درمیانے درجے کے انٹرپرائزز کی ترقی کے محرک کی حمایت کرنے میں ہمارے پختہ یقین کا ثبوت ہے۔

یہ بورڈ بہت سی یقین دہانیوں کے ساتھ اور مالیاتی طور پر مشکلات کا شکار ایس ایم ای سیکٹر کی کمپنیوں کے لیے فنڈز اکٹھا کرنے کے لیے ایک زبردست چینل پیش کرتا ہے۔“