وزیر اعظم عمران خان میلسی میں عوامی جلسے سے خطاب آج کریں گے

وہاڑی: وزیر اعظم عمران خان صوبہ پنجاب کی تحصیل میلسی میں عوامی جلسے سے خطاب آج کریں گے جس کے دوران اپوزیشن کی تحریکِ عدم اعتماد سمیت دیگر سیاسی معاملات اور قومی و معاشی صورتحال پر گفتگو متوقع ہے۔

تفصیلات کے مطابق صوبہ پنجاب پیپلز پارٹی اور حکمراں سیاسی جماعت پی ٹی آئی کی توجہ کا مرکز بن گیا۔ ایک جانب پیپلز پارٹی کا قافلہ احتجاج کی راہ پر گامزن ہے تو دوسری جانب پی ٹی آئی نے بھی عوامی طاقت کا مظاہرہ کرنے کیلئے پنڈال سجا لیا۔

یہ بھی پڑھیں:

وزیراعظم کل جلسے سے خطاب کرینگے، اپوزیشن سے متعلق اہم انکشافات متوقع

وزیر اعظم عمران خان صوبہ پنجاب کے ضلع وہاڑی کی سرسبز و شاداب تحصیل میلسی میں عوامی جلسے سے خطاب کریں گے جس کیلئے تیاریاں مکمل کر لی گئیں۔ پی ٹی آئی نے پنڈال سجا لیا۔ سیاسی کارکنان اور عوام کا جمِ غفیر جلسے میں شریک ہوگا۔

جلسے سے قبل وزیر اعظم عمران خان اراکینِ صوبائی و قومی اسمبلی سے ملاقاتیں کریں گے۔ میلسی کے عوامی اجتماع میں تحریکِ انصاف سیاسی قوت کا مظاہرہ کرے گی۔ عوام نے وزیر اعظم کا خطاب سننے کیلئے جلسہ گاہ کا رخ کرلیا۔

خیال رہے کہ اس سے قبل تحریک انصاف کے سینیٹر فیصل جاوید خان نے کہا کہ وزیراعظم عمران خان جلسے سے خطاب میں اپوزیشن سے متعلق اہم انکشافات کریں گے۔ اور عوام کیلئے کیے گئے اقدامات سے آگاہ بھی کریں گے۔

گزشتہ روز اپنے ٹوئٹر پیغام میں فیصل جاوید خان کا کہنا تھا کہ وہاڑی میں خطاب کے دوران وزیر اعظم اپوزیشن کی گرینڈ سازش بے نقاب کریں گے۔ تحریکِ عدم اعتماد کے پیچھے کیا ہے، بڑے انکشافات سامنے آنے والے ہیں۔