گوگل نیوز پر ہمیں فالو کریںاسلام آباد: وزیرِ اعظم عمران خان نے کشمیری قوم کو خراجِ تحسین پیش کرتے ہوئے کہا ہے کہ پاکستان حقِ خود ارادیت مل جانے تک کشمیریوں کی حمایت جاری رکھے گا۔
سماجی رابطے کی ویب سائٹ ٹوئٹر پر یومِ شہدائے کشمیر کے موقعے پر اپنے پیغام میں وزیرِ اعظم عمران خان نے کہا کہ ہم کشمیریوں کے ساتھ ہیں اور 13 جولائی 1931 کے 22 شہداء کو خراجِ تحسین پیش کرتے ہیں۔
پیغام میں وزیرِ اعظم نے کہا کہ ڈوگرہ حکمران کے فوجیوں نے پر امن کشمیری مظاہرین پر فائرنگ کی اور 22 کشمیریوں کو شہید کردیا۔ کشمیریوں پر بھارتی ظلم اور غیر قانونی قبضے کے خلاف نئی جدوجہد منظرِ عام پر آئی۔
وزیر اعظم عمران خان نے کہا کہ مقبوضہ کشمیر میں بھارتی ظلم و ستم، غیر قانونی قبضے اور انسانی حقوق کی سنگین خلاف ورزیوں کی ایک طویل داستان اور تاریخ ہے۔ کشمیری مردو زن غیر قانونی ظلم کے خلاف جدوجہد جاری رکھیں گے۔
انہوں نے کہا کہ پاکستان حقِ خود ارادیت کے حصول کی جدوجہد میں مظلوم کشمیریوں کے ساتھ ہے اور جب تک انہیں یہ حق اقوامِ متحدہ کی قراردادوں کے مطابق مل نہ جائے، ہم کشمیر کی حمایت پر کوئی سمجھوتہ نہیں کرسکتے۔
مزاحمت کی یہ بےخوف اور آزاد روح پوری طرح زندہ ہےکہ کشمیری مرد و زن غیر قانونی بھارتی تسلط کیخلاف پیہم صف آراء ہیں۔ اس منصفانہ جدوجہد میں پاکستان اہلِ کشمیر کے ساتھ ہے اور سلامتی کونسل کی قراردادوں کی روشنی میں انہیں ان کا حقِ خود ارادیت ملنے تک کسی قسم کا سمجھوتہ نہیں کرے گا۔
— Imran Khan (@ImranKhanPTI) July 13, 2021
