سکندر سلطان راجہ کو چیف الیکشن کمشنر بنانے کی منظوری

اسلام آباد: چیف الیکشن کمشنر کیلئے پارلیمانی کمیٹی نے سکندر سلطان راجہ کے نام کی منظوری دے دی ہے جبکہ نثار درانی سندھ اور شاہ محمد جتوئی بلوچستان سے ممبر ہونگے، اپوزیشن اور حکومتی رہنماؤں میں اتفاق ہو گیاہے۔

چیف الیکشن کمیشن کی تقرری کیلئے حکومت اور اپوزیشن ایک نام پر رضامند ہوگئے، پارلیمانی کمیٹی نے سکندر سلطان راجہ کے نام کی منظوری دے دی۔

پاکستان تحریک انصاف کی رہنما شیریں مزاری کہتی ہیں پارلیمانی کمیٹی کے فیصلے سے وزیراعظم عمران خان کو بھی آگاہ کر دیا جائے گاجبکہ سندھ سے ممبر کیلئے نثار درانی اور بلوچستان سے شاہ محمود جتوئی پر اتفاق رائے ہوا ہے۔

واضح رہے کہ وزیراعظم کی جانب سے اپوزیشن لیڈر کو لکھے گئے خط میں 3 نام تجویز کئے گئے تھے، جس کے جواب میں اپوزیشن لیڈر شہباز شریف کے خط میں حکومت کو کہا گیا تھا کہ 25 نومبر کو شروع ہونے والے عمل کو غیر ضروری طور پر التوا کا شکار کیا جا رہا ہے اس لیئے اپوزیشن کے ناموں پر بھی نظرثانی کی جائے۔

مزید پڑھیں: الیکشن کمیشن پر حکومت اپوزیشن اتفاقِ رائے بڑی کامیابی ہے۔وفاقی وزیر فواد چوہدری

اپوزیشن لیڈر شہباز شریف نے ناصر خان کھوسہ، اخلاق تارڑ اور عرفان قادر کے نام تجویز کئے تاہم بعد ازاں حکومت اور اپوزیشن کے درمیان موجودہ ناموں پر اتفاق طے پا گیا۔

 ملک میں چیف الیکشن کمشنر کا عہدہ 6 دسمبر سے خالی ہے جبکہ سندھ اور بلوچستان کے ممبران کی تقرریاں بھی گزشتہ ایک برس سے نہیں ہو سکی تھیں۔