اپوزیشن نے تحریک عدم اعتماد کے مسودے کو حتمی شکل دیدی،86 ارکان کے دستخط

اسلام آباد :اپوزیشن جماعتوں نے تحریک عدم اعتماد کے مسودے کو حتمی شکل دے دی ہے جس پر 80 سے زائد اراکین قومی اسمبلی کے دستخط ہیں۔

میڈیا ذرائع کے مطابق پاکستان مسلم لیگ ن ، پاکستان پیپلز پارٹی ، عوامی نیشنل پارٹی ، بلوچستان نیشنل پارٹی مینگل اور دیگر جماعتوں سے تعلق رکھنے والے 86ارکان کے دستخط شامل ہیں۔

مسودے کے مطابق ملک معاشی بحران کا شکار ہے اور ملک کو اس بحران سے نکالنے کا کوئی روڈ میپ نہیں ہے۔ ملک میں سیاسی عدم استحکام اور غیر یقینی کی صورتحال بھی ہے اور حکومت خارجہ پالیسی کے محاذ پر بھی ناکام ہوچکی ہے۔

مزید پڑھیں:سیاسی ٹاکرے کا حتمی مرحلہ، عدم اعتماد سے کس کا فائدہ، نقصان کس کو ہوگا؟

اپوزیشن کے مسودے میں کہا گیا ہے کہ قائد ایوان ارکان کی اکثریت کا اعتماد کھو چکے ہیں۔اپوزیشن نے اسمبلی اجلاس بلانے کے لیے ریکوزیشن بھی تیار کر لی ہے اور اپوزیشن لیڈر شہباز شریف کے چیمبر کو بھی الرٹ کر دیا گیا ہے کیونکہ تحریک عدم اعتماد اور ریکوزیشن کسی بھی وقت جمع کرائی جا سکتی ہے۔

ایک روز قبل پاکستان ڈیموکریٹک موومنٹ کے سربراہ مولانا فضل الرحمان نے کہا تھا کہ اگلے دو سے تین دن بہت اہم ہیں۔ اپوزیشن قیادت نے اپنا ہوم ورک مکمل کر لیا ہے ،میں 100فیصدیقین کے ساتھ کہہ رہا ہوں کہ اس بار تحریک عدم اعتماد کی کامیابی یقینی ہے۔