پاک بحریہ کا قومی دن ملک بھر میں ملی جوش و جذبے سے آج منایا جارہا ہے

کراچی: ملک بھر میں پاک بحریہ کا قومی دن آج ملی جوش و جذبے و ولولے سے منایا جارہا ہے جس کا مقصد سن 1965ء کی جنگ میں پاکستان نیوی کے کارناموں کو خراجِ عقیدت پیش کرنا ہے۔

تفصیلات کے مطابق 8 ستمبر کو ملک کی بری و فضائی افواج کے ساتھ دشمن  کو ناکوں چنے چبوانے والی پاک بحریہ کے شاندار کارناموں کی یاد میں قومی یومِ بحریہ منایا جاتا ہے۔ سن 1965ء کی پاک بھارت جنگ میں 8 ستمبر کا دن پاک  بحریہ نے اپنے نام کیا۔

آپریشن دوارکا کے دوران پاکستان نیوی نے دشمن کے چھکے چھڑا دئیے اور اہم تنصیبات کو تباہ کرکے پانیوں کی سرحدوں کی حفاظت یقینی بنائی۔ نیوی کے جوانوں نے دشمنوں کے دلوں پر ہیبت طاری کردی، اس کی یاد میں ہر سال 8 ستمبر کو قومی دن منایا جاتا ہے۔

 قیامِ پاکستان کے 18 سال بعد ہی جارحیت پسند ہمسایہ دشمن نے پاکستان پر جنگ مسلط کردی۔ پاکستان کی فضائی، بری اور بحری افواج دشمن کے مقابلے میں جدید ترین اسلحے سے لیس نہ ہوتے ہوئے بھی بے جگری سے لڑیں اور فتح اپنے نام کی۔

پاک بحریہ نے جرات و بہادری، پیشہ ورانہ مہارت اور طیارہ بردار جہاز نہ ہونے کے باوجود اپنی ایک ہی آبدوز غازی کے ذریعے جنگی تاریخ میں ایسا کارنامہ سرانجام دیا کہ وقت کا مؤرخ اس پر حیران ہے۔ آبدوز غازی نے بھارتی بیڑے کو سمندری پانیوں کی  پیش قدمی سے روک دیا۔

کموڈور ایس ایم نور کی قیادت میں آپریشن دوارکا کے دوران بحریہ کے جہاز دشمن کے چھکے چھڑاتے رہے۔ 7 اور 8 ستمبر کی درمیانی شب کیے گئے حملوں میں قومی نیوی نے بھارت پر جنگی برتری ثابت کی۔یومِ بحریہ کے موقعے پر ملک بھر میں خصوصی تقریبات منعقد ہوں گی۔

یہ بھی پڑھیں: پاکستان کی زیر صدارت افغانستان کے ہمسایہ ممالک کا وزرائے خارجہ اجلاس