ملک سے پولیو کے خاتمے کےلیے آل پارٹیز کانفرنس  کے شرکاء پرعزم

اسلام آباد: آل پارٹیز کانفرنس کے شرکاء کا کہنا ہے پولیو ایک قومی مسئلہ ہے اور اس کے تدارک کےلیے ہم سب پرعزم ہیں۔ آل پارٹیز کانفرنس کے شرکاء کا کہنا ہے کہ سیاسی جماعتوں کے رہنما انفرادی طور پر بھی اپنا بھرپور کردار ادا کریں گے۔

تفصیلات کے مطابق پولیو ایمرجنسی پر آل پارٹیز کانفرنس کا انعقاد ہوا، جس میں پولیو کے خاتمے کے لئے معاہدے پر دستخط کیے گئے۔ آل پارٹیز کانفرنس کے مطابق پولیو کے مکمل خاتمے کے لئے تمام سیاسی جماعتیں متحد ہیں۔ سیاسی جماعتیں پولیو مہمات میں بھرپور کردار ادا کریں گے۔ اس موقع پر کانفرنس کا اعلامیہ بھی جاری کیا گیا۔ 

آل پارٹیز کانفرنس کے اعلامیے کے مطابق پولیو اور حفاظتی ٹیکہ جات پروگرام کیساتھ ملکر کام کریں گے۔ بچوں کو معذوری اور بیماریوں سے بچانا ہماری ذمہ داری ہے۔ پولیو کے خاتمے کے لئے قومی ایمرجنسی ایکشن پلان پر عملدرآمد یقینی بنائیں گے۔

اعلامیے میں کہا گیا ہے کہ انسداد پولیو اور حفاظتی ٹیکہ جات کی رسائی کے لیے سیاسی جماعتیں خصوصی پروگراموں کا انعقاد کریں گے۔ ویکسین ہر بچے کے لئے لازمی کرنے کے لیے تمام جماعتیں قانون سازی پر بھی کام کریں گے۔

آل پارٹیز کانفرنس کے مطابق عام انتخابات 2023 کے منشور میں بھی پولیو اور حفاظتی ٹیکہ جات کو شامل کریں گے۔ پولیو ورکرز کی خدمات قابل تحسین ہیں۔

کانفرنس میں پاکستان مسلم لیگ ن،پاکستان پیپلز پارٹی، پاکستان تحریک انصاف، متحدہ قومی موومنٹ، جماعت اسلامی، جے یو آئی، بلوچستان نیشنل پارٹی اور عوامی نیشنل پارٹی کے رہنماؤں نے شرکت کی۔

یہ بھی پڑھیں: گوجرانوالہ میں سوتیلی ماں کا بچوں پر بہیمانہ تشدد، اہل محلہ کا تحفظ فراہم کرنے کا مطالبہ