گوگل نیوز پر ہمیں فالو کریںلندن: پاکستان مسلم لیگ(ن) کے صدر اور قومی اسمبلی میں اپوزیشن لیڈر شہباز شریف کا کہنا ہے کہ پاکستان میں کورونا وائرس کے مریضوں کی تعداد بڑھناباعث تشویش ہے۔
لندن سے اپنے ایک بیان میں شہباز شریف نے کورونا وائرس سے عوام کی حفاظت یقینی بنانے کے لیے قومی حکمت عملی بنانے اور چین سے پیشہ ورانہ رہنمائی لینے کا مطالبہ کر دیا۔
شہباز شریف کا کہنا تھا کہ وزیراعظم اس معاملے پر حکمت عملی بنانے کے لیے تمام وزرائے اعلیٰ سمیت وزیراعظم آزاد کشمیر کو بھی بلائیں، ماہرین اور ڈاکٹرز کی ٹاسک فورس بنائی جائے تاکہ قومی پالیسی بنائی جاسکے۔
انہوں نے کہا کہ ضروری مشینیں، آلات اورعلاج کا طبی سامان بھی ہنگامی بنیادوں پر منگوایا جائے جب کہ چین سے کورونا سے نمٹنے کے انتظامات میں پیشہ ورانہ رہنمائی بھی لی جائے۔
واضح رہے کہ پاکستان میں کورونا وائرس کے دو کیسز کی تصدیق کے بعد ملک بھر میں حفاظتی انتظامات مزید سخت کردیے گئے ہیں اور ائیرپورٹس پر مسافروں کی اسکریننگ کا سلسلہ جاری ہے جبکہ ایران کے ساتھ فلائٹس آپریشن بھی معطل کردیا گیا ہے۔
مزید پڑھیں: کورونا وائرس: پاکستان نے ایران سے براہ راست فضائی آپریشن معطل کردیا
