آٹے کا بحران: راولپنڈی میں چکی کا آٹا 65 سے 70 روپے فی کلو فروخت ہونے لگا

پنجاب بھر کی طرح راولپنڈی میں بھی آٹے کا بحران شدت اختیار کرنے لگا اوپن مارکیٹ میں غیر معیاری اور کم وزن آٹے کے تھیلے کی قیمت 1ہزار روپے تک پہنچ گئی جبکہ چکی کا آٹا65سے70 روپے فی کلو گرام میں فروخت ہونے لگا۔

چکی کے آٹے، فائن آٹے اور میدے کی قیمتوں میں اضافے کے باعث نان بائیوں نے بھی روٹی اور نان کی قیمتوں میں مزید اضافے کا عندیہ دے دیا۔دوسری جانب چینی کا بحران بھی سر اٹھانے لگا۔

پرچون فروشوں نے صارفین کو چینی کی ممکنہ قلت کی نوید دیتے ہوئے چینی کی قیمتوں میں یکدم 6سے8روپے فی کلو گرام اضافہ کر دیا جس سے اوپن مارکیٹ میں چینی کی قیمت78روپے سے تجاوز کر گئی۔

تفصیلات کے مطابق اس وقت مارکیٹ میں 20کلو گرام کا تھیلا مکمل طور پر ناپید ہوچکا ہے جبکہ 15کلو گرام تھیلے کی قیمت 1ہزار روپے تک پہنچ گئی جبکہ10کلو گرام آٹے کا تھیلا بھی 700روپے تک پہنچ گیا۔

 اسی طرح چکی کا آٹا گزشتہ10دن میں 10روپے فی کلو گرام اضافے کے ساتھ75روپے فی کلو گرام میں فروخت ہونے لگا  جس سے شہریوں کے لیے دو وقت کی روٹی کا حصول بھی مشکل ہوگیا۔ 

شہریوں کے مطابق یوٹیلیٹی سٹورز اورموبائل فیئرپرائس شاپس پر800 روپے میں فروخت ہونے والاآٹا انتہائی غیر معیاری ہے جس میں بوسیدہ گندم، برادہ اور سوکھی روٹیاں پیس کر استعمال کی گئی ہیں۔

دوسری جانب آٹے کے بحران کے بعد چینی کا بحران بھی سر اٹھانے لگا ہے جس سے اوپن مارکیٹ میں 50کلو گرام تھیلے کی قیمت 450روپے اضافے کے ساتھ 3800روپے سے تجاوز کر گئی ہے۔

عوام کے لیے  100کلو گرام چینی کے تھیلے کی قیمت 900روپے اضافے کے ساتھ 7700روپے تک پہنچ گئی ہے اس طرح پرچون سطح پر چینی 78سے82روپے فی کلو گرام فروخت ہورہی ہے۔

اس حوالے سے دکانداروں کا کہنا ہے کہ ایک طرف آٹے کے تھیلے مطلوبہ تعدادمیں میسر نہیں اور دستیاب آٹا بھی بروقت نہیں ملتا جس کے لئے دکانداروں کو ایڈوانس بکنگ کرانا پڑتی ہے۔

دکانداروں کے مطابق بروقت گنے کی کرشنگ نہ ہونے کی وجہ چینی کی قلت کا سامنا ہے دوسری جانب شہریوں نے آٹے اور چینی کی قیمتوں میں یکدم ہوشربا اضافے پر شدید احتجاج کیا ہے۔ 

عوام کا کہنا ہے کہ حکومت عام آدمی کو ریلیف دینے میں ناکام ہو چکی ہے مقامی سطح پر کمشنر راولپنڈی کی جانب سے بھی گرانفروشوں اور تجاوزات کنندگان کے خلاف کاروائی سے معذرت کے بعد مافیا کے حوصلے بلند ہو گئے۔