زلفی بخاری کی فلاحی اتاشیوں کو بیرونِ ملک محصور پاکستانیوں کی مدد کی ہدایت

اسلام آباد: وزیرِ اعظم کے معاونِ خصوصی برائے سمندر پار پاکستانیز ذالفقار عباس بخاری نے فلاحی اتاشیوں کو بیرونِ ملک محصور پاکستانیوں کی مدد کی ہدایت کی ہے۔

کورونا وائرس کے باعث سمندر پار پاکستانیوں کی مشکلات میں اضافہ ہو رہا ہے جس کو مدنظر رکھتے ہوئے معاونِ خصوصی زلفی بخاری نے کمیونٹی ویلفیئر اتاشیوں کا اجلاس طلب کیا جس کے دوران سمندر پار پاکستانیوں کو درپیش مشکلات پر غور کیا گیا۔

معاونِ خصوصی زلفی بخاری نے پبلک ویلفیئر اتاشیوں کو ہدایت کی کہ پاکستانیوں کیلئے ریلیف آپریشن شروع کریں۔ سفارت خانوں، قونصلیٹ اور سول ایوی ایشن سے پاکستانیوں کے بارے میں معلومات لی جاسکتی ہیں۔

زلفی بخاری نے اتاشیوں کو ہدایت کی کہ سمندر پار پاکستانیوں کو درپیش مشکلات کی تفصیلات جاننے کے بعد پاکستانیوں کیلئے راشن، ادویات، ماسک اور دستانوں کی فراہمی کو یقینی بنائیں۔