ن لیگ قبضہ مافیا، غنڈوں کی سرپرست، پابندی عائد کی جائے، زرتاج گل

اسلام آباد: وزیرمملکت موسمیاتی تبدیلی زرتاج گل کا کہنا ہے کہ ن لیگ قبضہ گروپس اور غنڈوں کی سرپرستی کرتی ہے، ایسے لوگوں پر پارلیمنٹ ہاؤس میں آنے پر پابندی لگائی جائے۔

گزشتہ روز قومی اسمبلی میں ہونیوالی ہنگامہ آرائی کے حوالے سے ردعمل کا اظہار کرتے ہوئے انہوں نے کہا کہ ن لیگ نے سیاسی جماعت ہونے کا لبادہ اوڑھ رکھا ہے، بجٹ میں ہر طبقے کے لوگوں کی فلاح اپوزیشن سے برداشت نہیں ہوئی، رات 3 بجے تنظیم سازی کرنیوالے کو ترجمان بنا دیا گیا۔

دوسری جانب اسپیکر قومی اسمبلی اسد قیصر نے ایوان میں ہنگامہ آرائی پر برہمی کا اظہار کرتے ہوئے ذمہ دار اراکین کے قومی اسمبلی میں داخلے پر پابندی عائد کرنے کا اعلان کیا ہے۔

مزید پڑھیں:قومی اسمبلی میں بجٹ بک سے حملہ، ملیکہ بخاری کی آنکھ زخمی، وفاقی وزراء کی مذمت

گزشتہ روز قومی اسمبلی میں ہنگامہ آرائی ہوئی، حکومت اور اپوزیشن کے اراکینِ اسمبلی ایک دوسرے پر بجٹ کی نقول اچھالتے رہے۔ اسپیکر قومی اسمبلی اسد قیصر نے واقعے کی شدید مذمت کرتے ہوئے تحقیقات کا حکم دے دیا۔

وفاقی دارالحکومت اسلام آباد میں صحافیوں سے گفتگو کرتے ہوئے اسپیکر قومی اسمبلی اسد قیصر نے کہا کہ اپوزیشن اور حکومت کی بنچوں سے تعلق رکھنے والے کچھ قانون سازوں کا رویہ قابلِ مذمت اور مایوس کن ثابت ہوا۔

گفتگو کے دوران اسپیکر قومی اسمبلی اسد قیصر نے کہا کہ قواعد کی خلاف ورزی کرنے والے اراکین کو پارلیمنٹ کے ایوانِ زیریں میں داخلے کی اجازت نہیں دیں گے جبکہ واقعے کے ذمہ داروں کا تعین کرنے کیلئے تحقیقات ہوں گی۔