گوگل نیوز پر ہمیں فالو کریںکراچی ٹریفک پولیس نے حضرت علیؓ کے یوم شہادت کے موقع پر نکالے جانے والے مرکزی جلوس کے لیے تفصیلی ٹریفک پلان جاری کر دیا ہے۔
ٹریفک پولیس کے مطابق 21 رمضان المبارک 22 مارچ کو نشتر پارک میں مرکزی مجلس منعقد کی جائے گی جس کے بعد دن 1 بجے جلوس برآمد ہوگا۔
اس موقع پر ایم اے جناح روڈ کو گرو مندر سے ٹاور تک عام ٹریفک کے لیے بند رکھا جائے گا جبکہ متبادل راستوں پر ٹریفک کی روانی کو یقینی بنانے کے لیے ٹریفک پولیس اہلکار تعینات کیے جائیں گے۔
مرکزی جلوس نشتر پارک سے برآمد ہوگا اور نشتر پارک، نمائش، ایم اے جناح روڈ، سی بریز سے ہوتا ہوا صدر میں ایمپریس مارکیٹ پہنچے گا۔
وہاں سے یہ صدر ریگل، تبت سینٹر اور ایم اے جناح روڈ کے راستے بولٹن مارکیٹ سے ہوتا ہوا حسینیہ امام بارگاہ کھارادر پر اختتام پذیر ہوگا۔
متبادل راستے
ناظم آباد سے آنے والی ٹریفک لسبیلہ چوک اور نشتر روڈ کے ذریعے گارڈن جا سکے گی۔لیاقت آباد کے مسافر تین ہٹی، لسبیلہ چوک اور سینٹرل جیل کے راستے منزل تک پہنچ سکیں گے۔
حسن اسکوائر سے پی پی چورنگی جانے والی گاڑیاں کشمیر روڈ کے ذریعے سوسائٹی لائٹ سگنل کی طرف موڑی جائیں گی۔جیل فلائی اوور کی ٹریفک کو تین ہٹی اور نشتر روڈ کی طرف بھیجا جائے گا۔
شاہراہِ قائدین سے نمائش جانے والی گاڑیاں سوسائٹی لائٹ سگنل کے ذریعے کشمیر روڈ کی طرف موڑی جائیں گی۔جمشید روڈ سے گرو مندر آنے والے مسافر بہادر یار جنگ روڈ اور سولجر بازار کے راستے اپنی منزل تک پہنچ سکیں گے۔
انتظامیہ نے شہریوں سے اپیل کی ہے کہ وہ متبادل راستوں کا استعمال کریں اور کسی بھی ممکنہ پریشانی سے بچنے کے لیے ٹریفک پولیس کی ہدایات پر عمل کریں۔
