یاسر شاہ دوبارہ ٹیم میں شامل ہونے کے بعد بہترین کارکردگی کیلئے پر جوش

طویل عرصہ ٹیم سے باہر رہنے کے بعد دوبارہ قومی ٹیم جوائن کرنے والے مایہ ناز اسپنر یاسر شاہ نے کہا ہے کہ میں ٹیم واپسی پر شکر گزار ہوں اور نیٹس میں ٹیم کے ساتھ ٹریننگ کر کے لطف اندوز ہو رہا ہوں۔

یاسر کا سری لنکا کے خلاف بہت شاندار ریکارڈ ہے اور 2015 میں ان کے خلاف سیریز میں انہوں نے 24 وکٹیں لے کر پاکستان کی سیریز میں 1-2 سے فتح میں مرکزی کردار ادا کیا تھا۔

سری لنکا کے خلاف سیریز کی تیاریوں کے لیے لگائے گئے تربیتی کیمپ کے موقع پر گفتگو کرتے ہوئے کہا کہ ٹیم میں واپسی کا کوئی دباؤ نہیں اور میری نگاہیں اپنا ہی ریکارڈ توڑنے پر مرکوز ہیں۔

آسٹریلیا کے تاریخی دورہ پاکستان کے دوران انہیں ریزرو کھلاڑیوں کی فہرست کا حصہ بنایا گیا تھا البتہ انگوٹھے کی انجری کے سبب وہ ٹیم میں جگہ نہیں بنا سکے تھے۔

پاکستان کپ میں بلوچستان نے ان کی زیرقیادت کامیابی حاصل کی تھی اور وہ ایونٹ میں 24 وکٹوں کے ساتھ دوسرے کامیاب ترین باؤلر بن گئے تھے۔

لیگ اسپنر نے بتایا کہ پاکستان کے اسکواڈ کا حصہ بننے سے قبل میں نے نیشنل ہائی پرفارمنس سینٹر میں ایک ماہ طویل کیمپ میں شرکت کی تھی اور میں نے خود کو سری لنکا کی کنڈیشنز کے لیے تیار کرنے کی کوشش کی ہے۔

ان کا کہنا تھا کہ ہمارا سری لنکا میں ٹور میچ بھی ہے ، میں مکمل تیار ہوں اور یہاں ایک سیریز بھی کھیل چکا ہوں لہٰذا میں کافی پراعتماد ہوں۔

پاکستان دورہ سری لنکا کا آغاز تین روزہ میچ سے کرے گا جس کے بعد میزبان ٹیم کے خلاف پہلا ٹیسٹ میچ 16 جولائی سے کھیلا جائے گا۔