کراچی میں بدترین لوڈشیڈنگ کا سلسلہ جاری، معمولات زندگی درہم برہم

کراچی: شہر قائد میں مختلف فالٹس کا بہانہ بنا کر بدترین لوڈشیڈنگ کا سلسلہ جاری ہے جس کے باعث شہری پریشانی کا شکار ہیں۔کراچی کے کئی علاقوں میں کیبل اور پی ایم ٹی کے فالٹس کے نام پر بجلی کی بندش جاری ہے۔

لیاری، عثمان آباد، گلبہار، شومارکیٹ گارڈن، آگرہ تاج، شیرشاہ، سائٹ، بلدیہ، گلشن حدید، گڈاپ، ملیر، میمن گوٹھ، شاہ لطیف ٹاؤن، قائد آباد، لانڈھی اور کورنگی میں 3 سے 12 گھنٹے کی لوڈشیڈنگ جاری ہے۔

کیماڑی، سرجانی، اورنگی ٹاؤن، بنارس اور قصبہ کالونی میں بھی بجلی گھنٹوں گھنٹوں غائب ہے۔شدید گرمی میں لوڈشیڈنگ کے باعث شہری پریشانی کا شکار ہیں اور معمولات زندگی درہم برہم ہیں۔

واضح رہے کہ کے الیکٹرک کی جانب سے دعویٰ کیا گیا تھا کہ مستثنیٰ علاقوں میں لوڈشیڈنگ نہیں کی جارہی ہے تاہم کے الیکٹرک کے دعوؤں کے برعکس اب بھی مستثنیٰ علاقوں میں لوڈشیڈنگ کا سلسلہ جاری ہے۔

بدترین لوڈشیڈنگ کے باعث جو لوگ قرنطینہ میں ہیں یا اسمارٹ لاک ڈاؤن کے باعث گھروں سے باہر نہیں نکل سکتے وہ شدید مشکلات کا شکار ہیں، اس کے علاوہ مختلف علاقوں میں پانی کی قلت بھی پیدا ہوگئی ہے۔