موسمیاتی تبدیلیاں عروج پر، دُنیا بھر میں ماحولیات کا عالمی دن آج منایا جارہا ہے

اسلام آباد: پاکستان سمیت دنیا بھر میں ماحولیات کا عالمی دن آج منایا جارہا ہے، جس کا مقصد موسمیاتی تبدیلیوں، تحفظِ ماحول اور آلودگی کے خلاف شعور اجاگر کرنا ہے، جبکہ ماحولیاتی و موسمیاتی تبدیلیاں عروج پر ہیں۔ 

تفصیلات کے مطابق اقوامِ متحدہ کے تحت ہر سال 5 جون کے روز ماحولیات کا عالمی دن منانے کا اہتمام کیا جاتا ہے۔دن منانے کا آغاز سن 1974ء میں ہوا۔ رواں برس اِس دن کا عنوان صرف ایک زمین رکھا گیا ہے جس کے تحت زمین کی اہمیت اجاگر کی جائے گی۔

یہ بھی پڑھیں:

کیا آپ جانتے ہیں کہ دن میں سونا آپ کو خطرے میں ڈال سکتا ہے؟

عالمی ادارے اقوامِ متحدہ کا کہنا ہے کہ دُنیا بھر میں فضائی، آبی اور زمینی آلودگی کے مضر اثرات، سانس کے مسائل اور نت نئی بیماریاں عالمِ انسانیت کو فکر کی دعوت دے رہی ہیں۔ اقوامِ عالم کو موسمیاتی تبدیلیوں کے خلاف اقدامات اٹھانا ہوں گے۔

ماحولیات کے عالمی دن کے موقعے پر دنیا بھر میں مختلف تقاریب، سیمینارز اور واکس کا اہتمام کیا جائے گا جن میں عالمی برادری کے سامنے گرین ہاؤس افیکٹ اور دیگر اہم ماحولیاتی مسائل کے حل پر توجہ دینے کے مطالبات رکھے جائیں گے۔

گزشتہ برس عالمی یومِ ماحولیات کی مرکزی تقریب کی میزبانی پاکستان کے حصے میں آئی تھی۔ سابق وزیرِ اعظم عمران خان کے بلین ٹری سونامی منصوبے سمیت دیگر اقدامات کو عالمی سطح پر سراہا گیا۔