گوگل نیوز پر ہمیں فالو کریںکراچی کے علاقے سرجانی ٹاؤن میں ایک افسوسناک واقعہ پیش آیا جہاں ایک خاتون اور اس کا دس سالہ بیٹا اپنے گھر میں مردہ حالت میں پائے گئے جبکہ خاتون کا شوہر زخمی حالت میں ملا جسے فوری طور پر سول اسپتال کراچی منتقل کر دیا گیا۔
ایس ایس پی ویسٹ کے مطابق جب پولیس موقع پر پہنچی تو گھر اندر سے بند تھا جس سے شبہ ہوتا ہے کہ یہ کوئی گھریلو تنازعہ تھا جو سنگین رخ اختیار کر گیا۔
پڑوسیوں نے بتایا کہ واقعے سے پہلے گھر سے جھگڑے کی آوازیں سنائی دے رہی تھیں جبکہ ابتدائی تفتیش میں بھی یہ بات سامنے آئی ہے کہ کسی جھگڑے کے نتیجے میں یہ افسوسناک واقعہ پیش آیا۔ اس دوران میاں بیوی کی دو بیٹیاں بھی گھر میں موجود تھیں۔
پولیس کے مطابق لڑکیوں نے اپنے بیان میں بتایا کہ وہ عام طور پر صبح دس سے گیارہ بجے کے درمیان جاگتی ہیں مگر اس روز وہ شام ساڑھے چار بجے تک سوتی رہیں جس سے شک ظاہر کیا جا رہا ہے کہ ہوسکتا ہے کہ انہیں کوئی دوا دے کر سلایا گیا ہو۔
پولیس کے مطابق جاں بحق ہونے والی خاتون کی شناخت 35 سالہ ثناء اور بچے کی شناخت آٹھ سے دس سالہ محمد علی کے نام سے ہوئی ہے۔
موقع سے خون آلود چھری برآمد ہوئی ہے جسے ممکنہ طور پر قتل میں استعمال کیا گیا۔ دونوں بیٹیوں اور علاقے کے مکینوں کے بیانات تفتیش کا حصہ بنائے جا رہے ہیں۔
ایس ایس پی ویسٹ نے بتایا کہ زخمی شوہر فیصل اسپتال میں زیرِ علاج ہے اور جیسے ہی اس کی حالت سنبھلے گی، اسے حراست میں لے کر مزید پوچھ گچھ کی جائے گی۔ پولیس واقعے کو گھریلو تشدد کے پہلو سے دیکھ رہی ہے، اور ابتدائی تحقیقات مکمل ہونے کے بعد مقدمہ درج کیا جائے گا۔
اس سے قبل کراچی کے علاقے شاہ لطیف ٹاؤن میں ایک خاتون کو اپنے سابق عاشق کے قتل کی سازش میں گرفتار کیا گیا تھا۔
کراچی پولیس نے 72 گھنٹوں کے اندر اندر ایک سفاک قتل کیس حل کر لیا، جس کی ابتدا ایک لاوارث سوٹ کیس سے ملی جس میں ایک تشدد زدہ لاش برآمد ہوئی۔
پولیس کے مطابق گرفتار خاتون علیزہ نے اپنے موجودہ عاشق، سیکیورٹی گارڈ مولا بکس کے ساتھ مل کر سابق عاشق، بس کنڈکٹر آصف کو قتل کرنے کی سازش کی۔
تحقیقات سے پتہ چلا کہ آصف اور علیزہ کی چار ماہ قبل ایک رانی پور جانے والی بس میں ملاقات ہوئی تھی، اور آصف نے دو سے تین بار کراچی آ کر علیزہ سے ملاقات بھی کی تھی۔
مزید انکشاف ہوا کہ علیزہ کا شوہر بھی سیکورٹی گارڈ ہے اور وہی مولا بکس کے ساتھ کام کرتا تھا۔ ایک ماہ قبل مولا بکس علیزہ کے گھر آیا اور دونوں کے درمیان تعلق قائم ہو گیا، جو بعد ازاں قتل پر منتج ہوا۔
