ول اسمتھ نے اکیڈمی ایوارڈ سے استعفیٰ دے دیا

94ویں تقریب، آسکر 2022ء کی براہ راست نشریات کے دوران کامیڈین کرس راک کو مُکا مارا تھا، اس نا مناسب رویئے کے سبب ول اسمتھ نے اکیڈمی ایوارڈ سے استعفیٰ دے دیا ہے۔

غیر ملکی میڈیا کے مطابق ول اسمتھ نے اپنے رویئے پر شرمندہ ہوتے ہوئے واقعے سے متعلق کہا کہ اُن کا کرس راک کو مُکا مارنے کا عمل ’چونکانے والا، دردناک اور ناقابل معافی ہے’۔

انہوں نے کہا کہ ’میں نے اکیڈمی کے اعتماد کو ٹھیس پہنچایا ہے، میں نے آسکر کے لیے نامزد دوسرے فاتحین کو شاندار شام کا جشن منانے کے موقع سے محروم کر دیا، میرے اس عمل سے دل ٹوٹ گیا ہے۔‘

مزید برآں ول اسمتھ نے استعفیٰ دیتے ہوئے مزید کہاکہ ’لہٰذا، میں اکیڈمی آف موشن پکچر آرٹس اینڈ سائنسز کی رکنیت سے استعفیٰ دے رہا ہوں اور اکیڈمی کے بورڈ کی جانب سے میرے خلاف سامنے آنے والے مزید نتائج کو قبول کروں گا۔‘

یہ بھی پڑھیں: اڈاری ڈرامے کے اداکار احسن خان ٹوئٹر پر ٹرینڈ کیوں کررہے ہیں؟

یاد رہے کہ گزشتہ اتوار آسکر ایوارڈ کی تقریب میں اداکار ول اسمتھ کرس راک کی جانب سے اہلیہ، اداکارہ جاڈا پینکٹ اسمتھ کے گنج پن کا مذاق اڑانے پر اپنے جذبات پر قابو نہیں رکھ سکے تھے، کرس راک کے مذاق کے جواب میں اسمتھ نے اپنی کرسی سے اُٹھ کر اسٹیج پر کھڑے کرس راک کو بھرے ہال کے سامنے مکا جڑ دیا تھا۔

دریں اثناء آسکر ایوارڈ 2022 میں بطور بہترین اداکار نامزد ہونے والے ول اسمتھ ان نامناسب لمحات گزرنے کے ٹھیک 20 منٹ بعد آسکر جیتنے میں کامیاب ہو گئے تھے۔

ول اسمتھ نے ایوارڈ وصول کرتے ہوئے بھی اپنے اس رویئے پر شرمندگی کا اظہار کیا تھا اور بعد ازاں باقاعدہ طور پر کرس راک سے معافی بھی مانگ لی تھی۔