وزیراعظم کی صنعتوں،کاروباری سرگرمیوں کیلئے سہولتیں فراہم کرنے کی ہدایت

اسلام آباد:وزیر اعظم عمران خان نے صنعتکاروں کو ایکسپورٹس میں پیش آنیوالی مشکلات کو جلد از جلد حل کرنے کی ہدایت کرتے ہوئے کہا ہے کہ حکومت کا کام صنعتوں اور کاروباری سرگرمیوں کیلئے آسانیاں اور سہولتیں فراہم کرنا ہے۔

ملکی ترقی و خوشحالی صنعتی شعبے اور کاروباری طبقے کی ترقی سے وابستہ ہے،صنعتکارزراعت کے شعبے میں جدت لانے،مختلف فصلوں کی پیداواری صلاحیت بڑھانے کیلئے بڑے پیمانے پرکارپوریٹ فارمنگ شروع کرنے کیلئے تجاویز دیں۔

جمعہ کو وزیر اعظم عمران خان سے ملک کے معروف صنعتکاروں پر مشتمل وفد نے ملاقات کی۔ وفد میں وفد میں اعظم فاروق چراٹ سیمنٹ،بشیر علی محمد گل احمد، محمد علی تابہ لکی سیمنٹ،ثاقب شیرازی ہنڈا اٹلس،فواد مختارفاطمہ فرٹیلائزر،عارف حبیب عارف حبیب گروپ لمیٹڈاور حسین داداینگرو کارپوریشن شامل تھے۔

وفاقی وزیر محمدحماد اظہر،مشیرانِ وزیر اعظم عبدالرزاق داؤد،ڈاکٹر عبدلحفیظ شیخ اور ڈاکٹر عشرت حسین کے علاوہ اعلی سرکاری حکام بھی اس موقع پر موجود تھے۔ وفد کی شرکاء نے وزیراعظم کا شکریہ ادا کرتے ہوئے کہا کہ کاروباری سرگرمیوں کو میسرحکومتی سرپرستی کے مثبت نتائج آنا شروع ہو چکے ہیں۔

انہوں نے کہاکہ ملکی فارن ایکسچینج ریزرو کا بلند ترین سطح پر ہونا پاکستان کی معیشت میں استحکام کی عکاسی کرتا ہے۔انہوں نے کہا کہ حکومتی معاشی ٹیم ہر وقت ان کی رہنمائی اور مسائل کے حل کیلئے دستیاب ہوتی ہے۔انہوں نے وزیراعظم کو بتایا کہ حکومتی کاوشوں سے پاکستان کا کرنٹ اکاؤنٹ کا خسارے سے نکل کر سر پلس ہونا معیشت کیلئے انتہائی خوش آئند ہے۔

شرکا نے تعمیراتی شعبے کی سرپرستی پر وزیراعظم کا شکریہ ادا کرتے ہوئے کہا کہ اس وقت سیمنٹ کی کھپت ملکی تاریخ کی بلند ترین سطح پر ہے۔انہوں نے کہا کہ کرونا وبا کے باوجود تعمیراتی سرگرمیوں میں تیزی اور ٹیکسٹائل برآمدات میں اضافے سے معیشت پر مثبت اثرات مرتب ہو چکے ہیں اور لوگوں کو روزگار کے مواقع ملے ہیں۔

وفد کی شرکا نے حکومتی پالیسیوں پر مکمل اعتماد کا اظہار کرتے ہوئے معیشت کی بہتری کیلئے اپنے خدمات پیش کیں۔ وزیر اعظم نے اس موقع پر گفتگو کرتے ہوئے کہا کہ حکومت کا کام صنعتوں اور کاروباری سرگرمیوں کیلئے آسانیاں اور سہولتیں فراہم کرنا ہے۔

انہوں نے کہا کہ ملکی ترقی و خوشحالی صنعتی شعبے اور کاروباری طبقے کی ترقی سے وابستہ ہے۔انہوں نے کہا کہ حکومتی فیصلہ سازی کے عمل میں صنعتکاروں کی تجاویز کو شامل کیا جا رہا ہے جس کے مثبت اثرات مرتب ہو رہے ہیں۔

وزیر اعظم نے صنعتکاروں کو ایکسپورٹس میں پیش آنیوالے مشکلات کو جلد از جلد حل کرنے کی ہدایت کی۔وزیر اعظم نے صنعتکاروں سے زراعت کے شعبے میں جدت لانے اور مختلف فصلوں کی پیداواری صلاحیت بڑھانے کیلئے بڑے پیمانے پرکارپوریٹ فارمنگ شروع کرنے کیلئے تجاویز مانگ لیں۔