تائیوان نے آزادی کا اعلان کیا تو بیجنگ جنگ شروع کردیگا، چین نے امریکا کو خبردار کردیا

سنگاپور: چین کے وزیرِدفاع نے امریکی ہم منصب کو خبردار کرتے ہوئے کہا کہ اگر تائیوان نے آزادی کا اعلان کیا تو بیجنگ جنگ شروع کرنے میں ہچکچاہٹ محسوس نہیں کرے گا۔

فرانسیسی خبر رساں ادارے اے ایف پی کے مطابق جمعے کو چین کے وزیر دفاع وی فینگ کی جانب سے یہ انتباہ ایسے وقت میں سامنے آیا ہے جب انہوں نے سنگاپور میں سکیورٹی اجلاس ’شنگری لا ڈائیلاگ‘ کے موقع پر امریکی وزیر دفاع لائیڈ آسٹن سے براہ راست ملاقات کی۔

چینی وزیرِ دفاع نے کہا کہ اگر کوئی بھی تائیوان کو چین سے الگ کرنے کی کوشش کرے گا تو چینی فوج کسی بھی قیمت پر جنگ شروع کرنے میں ہچکچاہٹ محسوس نہیں کرے گی۔

چین کی وزارتِ دفاع کے مطابق وزیر دفاع وی فینگ نے اس عزم کا اظہار کیا کہ بیجنگ ’تائیوان کی آزادی‘ کی سازش کو ناکام بنا دے گا۔

یہ بھی پڑھیں: کاروباری برادری نے وفاقی بجٹ کو عوام دوست قراردے دیا

بیجنگ جمہوری اور خودمختار تائیوان کو اپنا علاقہ قرار دیتا ہے اور اس نے اس عزم کا اظہار کیا ہے کہ اگر ضرورت پڑی تو طاقت کے استعمال سے ایک دن تائیوان پر قبضہ کرلے گا۔

واضح رہے کہ حالیہ مہینوں میں چین اور امریکہ کے درمیان تائیوان کے معاملے پر کشیدگی میں اضافہ ہوا ہے۔

امریکی وزیر دفاع نے لائیڈ آسٹن نے آبنائے تائیوان میں امن و استحکام کی اہمیت پر زور دیا اور تاائیوان کی موجودہ حیثیت میں یک طرفہ تبدیلیوں کی مخالفت کی۔

دوسری جانب امریکی محمکہ دفاع نے چین کو انتباہ کیا کہ وہ تائیوان کیخلاف مزید عدم استحکام پیدا کرنے والے اقدامات سے باز رہے۔

خیال رہے کہ گزشتہ ماہ جاپان کے دورے کے موقع پر امریکی صدر جو بائیڈن نے کہا تھا کہ ’اگر چین نے تائیوان پر حملہ کیا تو واشنگٹن تائیوان کی فوج کا دفاع کرے گا۔‘

ڈونلڈ ٹرمپ کے اس بیان کے بعد چین کا بڑا سخت ردعمل سامنے آیا تھا، چین نے کہا تھا کہ امریکہ آگ سے کھیل رہا ہے، اُس کا کہنا تھا کہ امریکہ چین پر قابو پانے کیلئے تائیوان کارڈ کھیل رہا ہے لیکن اس سے وہ خود جل جائے گا۔