کیا نورمقدم کو انصاف ملے گا؟

ایک طویل انتظار کے بعد بالآخر نورمقدم قتل کیس کا فیصلہ سنایا جائے گا، جس کے وحشیانہ قتل نے گزشتہ جولائی سے لے کر آج تک پورے ملک کو ہلا کر رکھ دیا ہے۔

اسلام آباد کی ایک سیشن عدالت بالآخر مرکزی ملزم ظاہر جعفر کے خلاف نور مقدم قتل کیس کا محفوظ کیا گیا فیصلہ سنائے گی۔ مگر اب بھی اس حوالے سے تشویش پائی جارہی ہے کہ کیا ظاہر جعفر مجرم قرار پائے گا؟ کیا نورمقدم کیس میں انصاف ملے گا؟

نورمقدم:

27 سالہ نور مقدم کو 20 جولائی 2021 کو اسلام آباد کے اعلیٰ درجے کے سیکٹر F-7/4 میں واقع ایک رہائش گاہ پر بے دردی سے قتل کیا گیا تھا۔ ظاہر جعفر کے خلاف اسی دن پہلی معلوماتی رپورٹ درج کی گئی تھی اور ملزم کو قتل کی جگہ سے گرفتار کیا گیا تھا۔

قتل کا محرک:

نورمقدم کے قتل کے مرکزی ملزم ظاہر جعفر پر اکتوبر 2021 میں اسلام آباد کی ایک عدالت نے جرم کے لیے باضابطہ فرد جرم عائد کی تھی۔ اس کے علاوہ ظاہر جعفر کے ساتھ خاندان کے دو ملازمین جمیل اور جان محمد پر بھی فرد جرم عائد کی گئی تھی۔

ملزم نے نور کو قتل کرنے سے پہلے اسے بد ترین تشدد کا نشانہ بنایا اور جنسی زیادتی کی، ملزم نے مقتول کو اس لیے قتل کیا کیونکہ اس نے اس سے شادی کی تجویز سے انکار کر دیا تھا۔

ظاہر جعفر کا یو ٹرن:

ظاہر جعفر نے جرم کے ارتکاب سے انکار کیا تھا اور ایک سماعت کے دوران کہا تھا کہ وہ ہوش کھو بیٹھا تھا اور جب وہ بیدار ہوا تو نور کو مردہ پایا۔ اس نے قتل میں قصوروار نہ ہونے کی استدعا کرتے ہوئے کہا تھا کہ وہ بے قصور ہے اور نور مقدم کے اہل خانہ اسے رقم کے حصول کے لیے پھنسانے کی کوشش کر رہے ہیں۔

ملزم کے والدین کی شمولیت:

رپورٹ کے مطابق ظاہر جعفر کے والدین عصمت آدم جی اور ذاکر جعفر نے جرم کا علم ہونے کے باوجود پولیس کو اطلاع نہیں دی۔

چوکیدار کے مطابق اس نے ذاکر جعفر کو اطلاع دی تھی۔ علاوہ ازیں ظاہر جعفر نے بھی اعتراف کیا کہ اس نے قتل سے پہلے اپنے والد کو آگاہ کیا تھا۔

پی ایف ایس اے رپورٹ:

پولیس کے مطابق پی ایف ایس اے کی رپورٹ درج ذیل حقائق کی تصدیق کرتی ہے۔قتل سے پہلے نور کے ساتھ زیادتی کی گئی۔ ڈی این اے کی تصدیق ہوگئی۔ نور نے قتل ہونے سے پہلے اپنی جان بچانے کی کوشش کی اور ظاہر کا ڈی این اے اس کے ناخنوں سے برآمد ہوا ہے۔ ظاہرجعفر کی پہنی ہوئی اور برآمد ہونے والی قمیض نورمقدم کے خون سے رنگی ہوئی تھی جس کے ڈی این اے کی تصدیق ہو چکی ہے۔

نورمقدم کو جائے وقوعہ سے برآمد ہونے والے سوئس چاقو سے قتل کیا گیا، اس کے خون اور ہینڈل پر خون کے نشانات پائے گئے۔

نور کے والد کی اپیل:

حالیہ سماعت میں نور مقدم کے والد نے اپنا بیان ریکارڈ کرایا تھا اور عدالت سے استدعا کی تھی کہ ان کی بیٹی کو قتل کرنے کے الزام میں ظاہر جعفر کو سزائے موت دی جائے۔اب جج عطا ربانی کی سربراہی میں سیشن کورٹ نے بالآخر کہا ہے کہ بنچ فیصلہ 24 فروری یعنی کل سنائے گا۔

کیا نور کو انصاف ملے گا؟

قانون کے مطابق نور مقدم کے قتل کا احتساب ضرور ہونا چاہئے اور ملزم کو قانون کے مطابق سزائے موت دی جانی چاہیے۔ ظاہر جعفر کے علاوہ اس کے والدین خصوصاً اس کے والد ذاکر کو اس کے بیٹے کے ساتھی کے طور پر جوابدہ ہونا چاہیے۔ سینئر وکلاء کا خیال ہے کہ اس حکم میں آخری آبزرویشن دینے کی ضرورت نہیں تھی۔