اعلیٰ عدالتوں کے ججز کو مشکوک خطوط ایک ہی جگہ سے کس نے بھیجے؟

اے آر وائی نیوز کے مطابق سپریم کورٹ اور اسلام آباد ہائیکورٹ کے ججز کو بھیجے جانے والے مشکوک دھمکی آمیز خطوط کے معاملے پر اسلام آباد پولیس، سی ٹی ڈی سمیت تمام اداروں کی تفتیش مختلف پہلوؤں سے جاری ہے۔

اس حوالے سے ذرائع نے اے آر وائی نیوز کو بتایا ہے کہ سی ٹی ڈی سپریم کورٹ اور ہائیکورٹ ججز کو بھجوائے گئے خطوط کی تفتیش کر رہی ہے اور اب تک کی تحقیقات میں یہ پتہ چلا ہے کہ سپریم اور ہائیکورٹ کے ججز کو خطوط ایک ہی جگہ سے بھیجے گئے۔

محکمۂ انسدادِ دہشت گردی (سی ٹی ڈی) نے ابتدائی تفتیش میں یہ انکشاف کیا ہے کہ تمام مشکوک خطوط سب ڈویژنل پوسٹ آفس سٹیلائٹ راولپنڈی سے ارسال کیے گئے۔ خطوط پر مہر بھی سب ڈویژنل پوسٹ آفس سٹیلائٹ ٹاؤن کی لگائی گئی ہے۔

نجی ٹی وی کا ذرائع کے حوالے سے کہنا ہے کہ خطوط کے پوسٹ باکس کا تعین کرنے کیلئے مزید تفتیش جاری ہے جبکہ سب ڈویژنل پوسٹ آفس سٹیلائٹ ٹاؤن کے عملے سے بھی پوچھ گچھ اور تحقیقات کی جارہی ہیں۔