لاک ڈاؤن کے باعث سفید پوش طبقہ زیادہ متاثر ہوا ہے، کنور نوید جمیل

کراچی:ڈپٹی کنوینر متحدہ قومی موومنٹ پاکستان کنور نوید جمیل نے کہا ہے کہ کورونا وائرس کی وجہ سے روزگار کی بندش سے متاثرہونے والے گھرانوں میں خدمت خلق فاؤنڈیشن کی جانب راشن اور افطار بکس کی بلاتفریق فراہمی انتہائی قابل ستائش اقدام ہے۔

کنور نوید جمیل نے کہا کہ پوری دنیا کی طرح پاکستان بھی کورونا وائرس کی وجہ سے مشکلات کا شکار ہے اور روزگار کی بندش کی وجہ سے عوام شدید معاشی دشواریوں میں مبتلا ہیں۔

ان خیالات کا اظہار انہوں نے بلدیہ زون میں چیئرمین بلدیہ غربی اظہار الدین احمد خان کے ہمراہ افطار بکس کی تیاری کے کام کا جائزہ لیتے ہوئے کیا، اس موقع پر اراکین رابطہ کمیٹی، سی او سی کے ممبران، اراکین صوبائی اسمبلی، پارلیمانی لیڈر، اراکین ڈسٹرکٹ کونسل اور علاقائی ذمہ داران بھی موجود تھے۔

کنور نوید جمیل نے کہا کہ اس کٹھن وقت میں خدمت خلق فاؤنڈیشن ضرورت مند گھرانوں میں راشن اور افطار پہنچانے کیلئے سب سے پہلے میدان عمل میں موجود ہے،بڑی خوشی کی بات ہے کہ مخیر حضرات اور دیگر فلاحی ادارے بھی عوام کی بھرپور مدد کررہے ہیں۔

چیئرمین بلدیہ غربی نے کہا کہ لاک ڈاؤن کی وجہ سے خصوصا سفید پوش طبقہ بہت زیادہ متاثر ہواہے مگر چونکہ متحدہ قومی موومنٹ متوسط طبقہ کی جماعت ہے اور ہمارے کارکن ہر گلی و محلہ میں موجود ہیں۔

انہوں نے کہا کہ سفید پوش گھرانوں تک راشن و افطار کی فراہمی کا عمل احسن طریقہ سے انجام دیا جارہا ہے جبکہ تمام علاقوں میں اینٹی کورونا اسپرے اور صفائی ستھرائی کا عمل بھی تسلسل کے ساتھ جاری رکھا جارہا ہے۔