وفاقی حکومت کا وعدہ وفا نہ ہوسکا، مختلف شہروں میں آٹا مہنگا

اسلام آباد: وفاقی حکومت کا وعدہ وفا نہ ہوسکا، مختلف شہروں میں آٹے کی قیمت میں کمی کی بجائے اضافہ ہوگیا۔ لاہور سمیت پنجاب بھر میں آٹا 10روپے فی کلو مہنگا ہوگیا ہے۔

تفصیلات کے مطابق وزیر اعظم نے شانگلہ میں خطاب کرتے ہوئے کہا کہ میں خیبر پختونخوا میں آٹا سستا کردوں گا، تاہم آٹے کی قیمت حکومت کے وعدے کے ساتھ ہی بڑھنے لگی۔

یہ بھی پڑھیں:

ملک بھر میں مہنگائی کا طوفان، سبزی اور گھی کی قیمت میں ہوشربا اضافہ

لاہور سمیت پنجاب بھر میں آٹے کی قیمت میں فی کلو 10 روپے کا اضافہ ہوا۔ آٹے کا 20 کلو کا تھیلا 1100 سے 200 روپے مہنگا ہو کر 1300 روپے کا فروخت ہونے لگا۔

فلور ملز کا کہنا ہے کہ ہمیں گندم مہنگی مہیا کی جارہی ہے، یہی وجہ ہے کہ آٹے کی قیمت میں بھی اضافہ کرنا پڑا۔ راولپنڈی میں آٹے کے 20 کلوگرام تھیلے کی قیمت 1450 روپے ہوگئی۔

پشاور میں آٹے کی قیمت میں 5 روپے فی کلو کا اضافہ ہوا۔ 20 کلو آٹے کے تھیلے کی قیمت 1400روپے ہو گئی۔ پشاور کے ڈیلرز کا کہنا ہے کہ پنجاب سے آٹے کی سپلائی بند ہوگئی ہے۔

قبل ازیں وزیر اعظم شہباز شریف نے شانگلہ میں عوام کے جلسۂ عام سے خطاب کرتے ہوئے کہا کہ وزیر اعلیٰ عوام کو سستا آٹا دیں، ورنہ میں اپنے کپڑے بیچ کر بھی آپ کو سستا آٹا دوں گا۔