سندھ: گندم مارکیٹ میں آگئی، خریداری مراکز قائم نہ ہوسکے، ذخیرہ اندوزی کا خدشہ

سکھر: زیریں سندھ کے علاقوں پنگریو،جھڈو ،شادی لارج،نندو،کھوسکی ،ٹنڈوباگومیں گندم کی فصل کی کٹائی شروع ہوگئی ہے اورنئی گندم مارکیٹ میں آگئی ہے تاہم محکمہ خوراک خریداری پالیسی بنانے میں تاحال ناکام ہے جس کی وجہ سے نئی گندم بھی مافیا کے ہاتھوں ذخیرہ ہونے کاخدشہ پیدا ہوگیا ہے ۔

کاشت کارتنظیموں کے مطابق محکمہ زراعت سندھ کی نااہلی کے باعث گزشتہ سال بھی گندم کی سرکاری خریداری نہیں ہوسکی تھی اور امسال بھی گندم کی زیادہ مقدار پرائیویٹ مارکیٹ میں فروخت ہونے کا اندیشہ ہے۔

مزید پڑھیں: سندھ میں 32کروڑسے زائد کی 88 ہزار گندم کی بوریاں غائب ،حکام علم

سندھ چیمبر آف ایگریکلچر کاکہناہے کہ ملک کی معیشت کو مزید مضبوط کرنے کیلئے ہمیں زراعت کو مستحکم اور مضبوط بنانا ہوگاکیونکہ ملک کی پہلی سیکیورٹی زراعت ہے ، ملک خوشحال ہوگا تو عوام خوشحال ہونگے۔

اس وقت ملک میں آٹے اور چینی کا کوئی بحران نہیں اور اگر کہیں ہے تو وہ مصنوعی ہے ، حکومت وقت کو پاکستان کی زرعی پیداوار بڑھانے سمیت اس سے منسلک لوگوں کو ریلیف فراہمی کیلئے سنجیدگی سے سوچنا ہوگا ۔