سندھ میں پانی کی قلت، بیراجز میں سطحِ آب کم ہوگئی، عوام سراپا احتجاج

کراچی: سندھ میں پانی کی قلت پیدا ہوگئی، بیراجز میں سطحِ آب انتہائی کم ہے جس پر عوام سراپا احتجاج ہیں۔ مختلف شہروں کے باسیوں نے سندھ حکومت سے  پانی کی مناسب دستیابی یقینی بنانے کا مطالبہ کیا ہے۔

تفصیلات کے مطابق سندھ کے مختلف شہروں میں پانی کی قلت پیدا ہوگئی۔ بیراجز میں پانی کی سطح انتہائی کم ہے۔ جامشورو اور کوٹری کے مقام پر قلتِ آب 57 فیصد تک جا پہنچی۔

یہ بھی پڑھیں:

عالمی مارکیٹ میں تیل اور اشیائے ضروریہ کی قیمتوں میں اضافہ

کراچی کو بیراج سے 2200 کی بجائے 1495 کیوسک پانی فراہم کیا جارہا ہے۔ گدو بیراج سے نکلنے والی تین بڑی نہریں پانی کی قلت کے باعث بند ہو گئیں۔دیگر بیراجز پر بھی پانی کی قلت ہے۔ 

سکھر بیراج پر پانی کے ذخیرے میں 52 فیصد تک کمی ریکارڈ کی گئی۔ مٹیاری میں علاقہ مکین پانی کے کین اور گھڑے لے کر احتجاج کیلئے گھرون سے نکل آئے۔ عوام نے پانی کی مناسب دستیابی یقینی بنانے کا مطالبہ کیا۔

دوسری جانب سابق گورنر سندھ نے وفاقی وزیرِ آبپاشی سے مستعفی ہونے کا مطالبہ کردیا۔ عمران اسماعیل کا کہنا ہے کہ خورشید شاہ سندھ کے پانی سے وڈیروں کی زمینیں آباد کر رہے ہیں۔

سابق گورنر سندھ نے کہا کہ پانی کی مصنوعی قلت پیدا کرکے زمینیں ہڑپنے کی کوشش کی جارہی ہے۔ پی ٹی آئی سندھ میں حکومت بنا کر استحصالی نظام کا خاتمہ کردے گی۔ سابق وزیر فواد چوہدری نے کہا کہ سندھ کا پانی چوری ہورہا ہے۔

فواد چوہدری نے کہا کہ پیپلز پارٹی کے وڈیرے پانی چوری میں ملوث ہیں۔ سندھ کا پانی غریب ہاری تک نہیں پہنچ رہا۔ پنجاب کو موردِ الزام ٹھہرا کر صوبائی وزراء منافرت کی سیاست کرتے ہیں۔کسان اور ہاری زرداری مافیا سے تنگ ہیں۔