کراچی، آئی آئی چندریگر روڈ پر پانی کی لائن پھٹنے سے سڑک زیرِ آب

کراچی کے مصروف ترین علاقے آئی آئی چندریگر روڈ پر پانی کی لائن پھٹ جانے کے باعث سڑک زیرِ آب آگئی ہے۔

تفصیلات کے مطابق آئی آئی چندریگر روڈ پر 6 انچ قطر کی پانی کی لائن پھٹ گئی۔ چیف ایگزیکٹو کراچی واٹر اینڈ سیوریج بورڈ اسد اللہ خان نے کہا کہ پانی کی لائن متاثر ہونے کی وجہ سے سڑک پر پانی پھیل گیا ہے۔

یہ بھی پڑھیں: 

کلفٹن میں پانی کی لائن پھٹنے سے انڈر پاس زیرِ آب آگیا

چیف ایگزیکٹو واٹر بورڈ اسد اللہ خان نے کہا کہ پانی ضیاء الدین روڈ سے آئی آئی چندریگر جانے والی سڑک تک پھیلا ہوا ہے۔ پانی کا مزید پھیلاؤ روکنے کیلئے واٹر لائن کو پمپنگ اسٹیشن سے بند کردیا ہے۔

اسد اللہ خان نے کہا کہ پانی کے اخراج کیلئے سکشن مشین جائے وقوعہ پر پہنچ چکی ہیں۔ پانی کی پائپ لائن متاثر ہونے کے اسباب کی تفتیش کر رہے ہیں۔ 

خیال رہے کہ اس سے قبل کراچی کے علاقے کلفٹن میں پانی کی لائن پھٹنے سے انڈر پاس زیرِ آب آگیا جس سے ٹریفک معطل ہو گئی۔ واٹر لائن کی مرمت شروع کردی گئی۔

آج سے 2 سال قبل کلفٹن میں سابقہ پنجاب چورنگی کے ساتھ واقع انڈر پاس کے اندر پانی کی لائن پھٹ گئی۔ انڈر پاس زیرِ آب آنے سے ٹریفک کا سلسلہ معطل ہوگیا جس کے بعد پولیس اور رینجرز کی نفری طلب کر لی گئی۔