گوگل نیوز پر ہمیں فالو کریںکراچی کی برقع پوش لڑکی فائزہ اعظم خان نے اپنی شاندار کرکٹ صلاحیتوں کی وجہ سے دنیا کو حیران کر دیا ہے۔
سوشل میڈیا پلیٹ فارمز پر ایک ویڈیو گردش کر رہی ہے جس میں کراچی سے تعلق رکھنے والی نوجوان باہمت لڑکی فائزہ اعظم خان کو پورے پردے میں شاندار انداز میں کرکٹ کھیلتے دیکھا جا سکتا ہے۔
پیشے کے اعتبار سے بینک افسر فائزہ نے حال ہی اپنی کرکٹ مہارت دکھاتے ہوئے ایک ویڈیو شیئر کی، جو دیکھتے ہی دیکھتے وائرل ہوگئی اور دیکھنے والوں ان کی ہمت اور حوصلے کو سراہا۔
فائزہ نے ایک نجی ٹی وی کو انٹرویو دیتے ہوئے بتایا کہ وہ پیشے کے اعتبار سے بینکر ہیں اور محض ہفتے میں ایک دن انہیں کرکٹ کھیلنے کا ملتا ہے، جس کیلئے وہ صدر کے فریئر ہال آتی ہیں اور اپنے کرکٹ کو شوق پورا کرنے کی کوشش کرتی ہیں۔
ڈیلی ایکسپریس کے مطابق فائزہ کا کہنا تھا کہ کھیل کے دوران لوگ ان کی کارکردگی کو سراہتے ہیں اور کبھی کوئی بدنظمی نہیں ہوئی، ان کا کہنا تھا کہ 3 سال سے باقاعدہ کرکٹ کھیلنے کی تربیت حاصل کر رہی ہوں تاہم میری پہچان یہاں برقع پہن کر بیٹنگ اور فیلڈنگ کرنا ہے۔
نوجوان خاتون کرکٹر کا کہنا تھا کہ میں نے گھر والوں کی مکمل حمایت سے یہ سفر شروع کیا۔ برقع میری پہچان ہے، لیکن یہ میری صلاحیتوں کی راہ میں رکاوٹ نہیں۔ میں چاہتی ہوں کہ تمام خواتین کو پتہ چلے کہ پردہ اور کھیل دونوں ایک ساتھ ممکن ہیں۔
مختصر سی ویڈیو میں فائزہ کو کور ڈرائیو، پل شاٹ اور ہک کرتے دیکھا جاسکتا ہے جس میں وہ نہایتی پروفیشنل انداز میں اپنی مہارت کا مظاہرہ کررہی ہیں۔
