گوگل نیوز پر ہمیں فالو کریںکراچی میں لیاری گینگ وار کے سرغنہ عزیر بلوچ کی جے آئی ٹی رپورٹ میں انکشاف کیا گیا ہے کہ غیر قانونی ایرانی شہریت رکھنے والا ملزم ملک کا غدار اور جاسوس ہے۔
تفصیلات کے مطابق جے آئی ٹی رپورٹ کی فائنڈنگز میں کہا گیا ہے کہ عزیر بلوچ اپنے جرائم پیشہ گروہ کے ساتھ بڑے پیمانے پر قتل و غارت اور ٹارگٹ کلنگز میں ملوث رہا جس میں اپنے دشمن اور معصوم شہریوں کا قتل بھی شامل ہے جس میں لسانی و سیاسی بنیاد پر بھی قتل شامل ہیں۔
جے آئی ٹی رپورٹ میں کہا گیا ہے کہ ملزم نے متعدد پولیس اور رینجرز کے اہلکاروں کی جانیں لیں اور پولیس اسٹیشنز پر حملے کرنے کے ساتھ ساتھ سرکاری جائیدادوں کو نقصان پہنچایا۔ ملزم کے بہت سے اثاثے ہیں جن کی پاکستان اور دبئی میں کالے دھن کے ذریعے دیکھ بھال کی جاتی ہے۔
رپورٹ میں کہا گیا ہے کہ ملزم نے اپنے ملازمین کے ذریعے بڑی بڑی رقوم حاصل کیں اور اپنے بیرونِ ملک اثاثوں کا اقرار کیا۔ اس کے پاس ایرانی شہریت کی غیر قانونی دستاویزات ہیں۔ اس نے بڑے پیمانے پر غیر قانونی ہتھیار اور متعدد ذرائع سے اسلحہ بارود بھی خریدا۔
