بزدار کی جگہ نئے وزیر اعلیٰ کا انتخاب، وزیراعظم نے 5رکنی کمیٹی تشکیل دیدی

لاہور / اسلام آباد: وفاقی حکومت مبینہ طور پر عثمان بزدار کی جگہ نیا وزیر اعلیٰ پنجاب لانے کیلئے رضا مند ہوگئی۔ وزیر اعظم نے 5 رکنی کمیٹی تشکیل دے دی جس کا کام نئے وزیر اعلیٰ کا انتخاب ہوگا۔

تفصیلات کے مطابق وزیر اعظم نے سردار عثمان بزدار کو وزارتِ اعلیٰ سے ہٹانے کا فیصلہ کرلیا۔ ق لیگ، علیم خان اور جہانگیر ترین گروپ کو عثمان بزدار کے خلاف سخت تحفظات ہیں جنہیں دور کرنا حکومت کی ترجیحات میں شامل ہے۔

یہ بھی پڑھیں:

وزیر اعظم کا آصف زرداری کو بندوق کی دھمکی دینا ناقابلِ برداشت ہے۔بلاول

سردار عثمان بزدار کی جگہ نئے وزیر اعلیٰ کے انتخاب کیلئے وزیر اعظم نے 5 رکنی کمیٹی تشکیل دے دی جو جہانگیر ترین گروپ اور ق لیگ سمیت پارلیمانی پارٹی رہنماؤں سے بھی نئے وزیر اعلیٰ کے انتخاب پر مشاورت کرے گی۔

وفاقی حکومت تحریکِ عدم اعتماد کا معاملہ جلد نمٹانے کا فیصلہ کرچکی ہے۔ اپوزیشن کی تحریک سے او آئی سی اجلاس سے قبل نمٹنے کا فیصلہ کر لیا گیا جبکہ او آئی سی اجلاس کے وقت حکومت کسی سیاسی بحران کی متحمل نہیں ہوسکتی۔