پیٹ کی زائد چربی سے پریشان ہیں؟ یہ دس مشروبات استعمال کریں، بڑھی ہوئی توند سے نجات پائیں

بہت سے لوگوں کے نزدیک پیٹ کی چربی بڑی حد تک پیچیدہ مسئلہ نظر آتا ہے تاہم ماہرین کا کہنا ہے کہ وزن کم کرنے، ہاضمہ بہتر بنانے اور اس بحران کو کم کرنے کے لیے قدرتی حل تک پہنچا جا سکتا ہے۔

العربیہ نے اپنی رپورٹ میں نئے تحقیقی مطالعے کے حوالے سے بتایا ہے کہ درج ذیل میں سے کوئی بھی مشروب پینے سے میٹابولزم بہتر ہو سکتا ہے، اپھار کم ہو سکتا ہے اور پیٹ کی چربی جلائی جا سکتی ہے۔ اس کے نتیجے میں ایک متوازن صحت مند زندگی حاصل ہو سکتی ہے۔ یہ بات Times of India اخبار نے اپنی رپورٹ میں بتائی۔

1 – لیموں اور شہد کا پانی

ایک کپ گرم پانی میں ایک کھانے کا چمچہ لیموں کا رس اور ایک چائے کا چمچہ شہد ملا کر پی لیا جاتا ہے۔ اس مشروب کو خالی پیٹ پینا بہتر سمجھا جاتا ہے کیوں کہ یہ میٹابولزم تیز کرتا ہے، ہاضمہ آسان بناتا ہے اور چربی جلانے میں مدد گار ثابت ہوتا ہے۔

2 – زیرے کا پانی

اس مشروب کو تیار کرنے کا ایک اور طریقہ یہ ہے کہ ایک چائے کا چمچہ زیرے کے بیجوں کو ایک کپ پانی میں رات بھر بھگونے کے بعد اس مشروب کو چھان کر پی لیا جائے۔ یہ مشروب خالی پیٹ پینا ہاضمے کو بہتر بناتا ہے، اپھار کم کرتا ہے اور چربی کے میٹابولزم کو تیز کرتا ہے۔ اس سے وزن کم کرنے میں مؤثر مدد ملتی ہے۔

3 – میتھی کا پانی

اسی طرح، ایک چائے کا چمچہ میتھی کے بیجوں کو ایک کپ پانی میں رات بھر بھگو کر رکھیں۔ پھر اس مشروب کو چھان کر خالی پیٹ پینا خون میں شوگر کی سطح کو متوازن کرتا ہے، بھوک کو کم کرتا ہے، اور پیٹ کے حصے میں چربی کے جلنے میں مدد فراہم کرتا ہے۔

4 – سونف کا پانی

اسی طرح، ایک چائے کا چمچہ سونف کے بیج کو ایک کپ نیم گرم پانی میں 10 منٹ تک بھگو کر رکھا جاتا ہے۔ پھر مشروب کو چھان کر پیا جاتا ہے تاکہ اپھار کو کم کیا جا سکے، ہاضمہ میں مدد کی جا سکے اور میٹابولزم کو بہتر بنایا جا سکے، جو قدرتی اور مستحکم طریقے سے وزن کم کرنے میں مدد گار ثابت ہوتا ہے۔

5 – ادرک کا پانی

اس کے علاوہ، اس مشروب کو تیار کرنے کے لیے تازہ ادرک کا ایک انچ کا ٹکڑا ایک کپ پانی میں 5 منٹ تک اُبالا جاتا ہے۔ پھر ادرک کے اس پانی کو چھان کر پیا جا سکتا ہے تاکہ سوزش کم کی جا سکے، ہاضمہ بہتر بنایا جا سکے اور میٹابولزم کو بڑھا کر وقت کے ساتھ پیٹ کی چربی کو مؤثر طریقے سے جلایا جا سکے۔

6 – دھنیے کا پانی

غالبا اس مشروب کی تیاری کا مثالی طریقہ یہ ہے کہ ایک چائے کا چمچہ دھنیے کے بیجوں کو ایک کپ پانی میں رات بھر بھگو دیا جائے۔ پھر اس مشروب کو چھان کر فوراً پیا جائے تاکہ جسم سے زہر نکالنے، کولیسٹرول کو متوازن کرنے اور ہاضمہ بہتر بنانے میں مدد ملے۔ اس سے وزن کم کرنے میں فائدہ ہوتا ہے۔

7 – آملے کا رس

آملے کا رس تیار کرنے کے لیے تازہ آملہ کے رس کے دو کھانے کے چمچے ایک کپ پانی میں ملا کر پی لیا جاتا ہے۔ آملہ کا رس پینے سے میٹابولزم بڑھانے، جسم سے زہر نکالنے، چربی جلانے اور عمومی طور پر آنتوں کی صحت بہتر بنانے میں مدد ملتی ہے۔

8 – ہلدی کا دودھ

ہلدی کا دودھ “سنہری مشروب” کے نام سے مشہور ہے۔ اسے تیار کرنے کے لیے ڈیڑھ چائے کا چمچہ ہلدی پاؤڈر نیم گرم دودھ کے ایک کپ میں ملایا جاتا ہے۔ ہلدی کا دودھ پینے سے سوزش کم کرنے، ہاضمہ بہتر بنانے اور چربی کا میٹابولزم تیز کرنے میں مدد ملتی ہے۔ اس سے آنتوں کی صحت بہتر ہوتی ہے اور وزن کو برقرار رکھنے میں مدد ملتی ہے۔

9 – دار چینی کا پانی

دار چینی اپنی خصوصیات کے باعث خون میں شوگر کی سطح کو منظم کرنے میں مدد دیتی ہے۔ اگر ایک ڈیڑھ چمچہ دار چینی کا پاؤڈر گرم پانی کے کپ میں ملا لیا جائے، تو یہ ایک صحت بخش مشروب بنتا ہے۔ یہ نظامِ ہضم کے لیے مفید ہے، بھوک کو کم کرتا ہے، اور پیٹ کی چربی کو مؤثر طریقے سے کم کرنے میں مددگار ثابت ہوتا ہے۔

10 – اطریفل کی چائے

ڈیڑھ چائے کا چمچہ اطریفل پاؤڈر کو ایک کپ نیم گرم پانی میں ملا لیا جاتا ہے۔ اطریفل کی چائے کو سونے سے پہلے پینے کی تجویز دی جاتی ہے تاکہ ہاضمہ بہتر بنایا جا سکے، جسم کو زہریلے مادوں سے صاف کیا جا سکے، وزن میں صحت مند اور قدرتی کمی کو ممکن بنایا جا سکے اور پیٹ کم کیا جا سکے۔

یاد رہے کہ پیٹ کی چربی یا توند وہ حالت ہے جس میں پیٹ پر چربی کے خلیات کا حجم بڑھ جاتا ہے۔ یہ اس علاقے میں چربی کے جمع ہونے کا نتیجہ ہوتا ہے۔ اکثر توند وزن کے اضافے کے ساتھ آتی ہے، لیکن کبھی ایسا نہیں بھی ہوتا۔
تاہم، یہ ایک حقیقت ہے کہ یہ ایک ایسا مسئلہ ہے جس سے دنیا بھر میں بہت سے لوگ پریشان ہیں اور اس کا حل تلاش کرنے میں الجھن کا شکار ہیں۔