امریکا نے افغانستان کو اتحادی ممالک کی فہرست سے نکال دیا

واشنگٹن: امریکا کی جو بائیڈن حکومت نے افغانستان کو غیر نیٹو رکن اتحادی ممالک کی فہرست سے نکال دیا ہے، جس کے ساتھ ہی امریکا کی افغانستان میں سکیورٹی مصروفیات کا سلسلہ بھی اختتام کو پہنچا۔

تفصیلات کے مطابق امریکی صدر جو بائیڈن نے افغانستان کے ساتھ کم و بیش 20سال سے جاری فوجی آپریشن اور سکیورٹی کے نام پر مداخلت کا سلسلہ بند کرنے کا اعلان کرتے ہوئے کانگریس کو خط لکھ دیا۔

یہ بھی پڑھیں:

سعودی عرب سمیت خلیجی ممالک میں عید الاضحیٰ آج منائی جارہی ہے

خط میں امریکی صدر جو بائیڈن نے کہا کہ میں غیر نیٹو اتحادی کے طور پر افغانستان کے اہم عہدے کو منسوخ کرنے کا نوٹس دے رہا ہوں۔ اس اعلان کے بعد سے افغانستان کو حاصل مراعات منسوخ ہوگئیں۔

ماہرینِ عالمی امور کا کہنا ہے کہ ایک بڑے اتحادی کے طور پر افغانستان امریکا سے فوجی تربیت اور امداد حاصل کرسکتا تھا اور نیٹو افواج سے بھی فوجی سازوسامان کا لین دین کیا جاسکتا تھا۔

عالمی امور کے ماہرین کا مزید کہنا ہے کہ افغانستان تمام تر مراعات سے محروم ہوگیا ہے تاہم امریکا کی ملک میں مداخلت کے خدشات بھی کم ہوگئے ہیں۔ پاکستان سمیت امریکا کے ایسے 18مزید اتحادی ممالک ہیں۔

یہ تمام اتحادی ممالک نیٹو کی رکنیت نہیں رکھتے۔ امریکا کے دیگر ایسے اتحادیوں میں ارجنٹائن، آسٹریلیا، بحرین، برازیل، کولمبیا، مصر، اسرائیل، جاپان، اردن، کویت، مراکش، نیوزی لینڈ اور فلپائن شامل ہیں۔

غیر نیٹو اتحادی ممالک میں قطر، جنوبی کوریا، تھائی لینڈ اور تیونس بھی شامل ہیں۔ واضح رہے کہ امریکی حکومت نے اگست 2021 میں افغانستان سے تمام امریکی فوجیوں کو واپس بلا لیا تھا۔