ہمارا ملک نیٹو کا رکن نہیں، نہ ہی بن سکتا ہے۔یوکرینی صدر کا اعتراف

کیف: یوکرینی صدر ولودومیر زیلنسکی نے اعتراف کرتے ہوئے کہا ہے کہ ہمارا ملک نیٹو کا رکن نہیں، نہ ہی بن سکتا ہے، ہمیں یہ حقیقت تسلیم کرنا ہوگی۔

تفصیلات کے مطابق گزشتہ روز عسکری حکام سے اپنے ویڈیو بیان میں صدر ولودومیر زیلنسکی نے کہا کہ یوکرین نیٹو کا رکن نہیں ہے، یہ سمجھنا ہوگا۔ ہم نے کئی برسوں تک سنا کہ نیٹو کے دروازے یوکرین کیلئے کھلے ہیں تاہم اب ایسا نہیں ہے۔

یہ بھی پڑھیں:

روس میں امریکی صدر اور کینیڈین وزیر اعظم کے داخلے پر پابندی عائد

ویڈیو بیان میں یوکرینی صدر نے کہا کہ ہمیں یہ سمجھنا ہوگا کہ ہم نیٹو کی رکنیت نہیں رکھتے، نہ ہی حاصل کرسکتے ہیں۔ ہم سے کہا جارہا ہے کہ یوکرین نیٹو میں شامل نہیں ہوسکتا۔ ہم عسکری اتحاد میں شمولیت اختیار نہیں کرسکتے۔ یہ درست ہے۔

قبل ازیں یوکرین نے یورپی یونین میں شمولیت کی درخواست کی جو منظور ہوگئی۔ واضح رہے کہ یوکرین مغربی دفاعی اتحاد کا شراکت دار سمجھا جاتا ہے تاہم نیٹو حکام نے روس یوکرین تنازعے میں براہِ راست مداخلت کی کوئی کوشش نہیں کی۔

گزشتہ ماہ روس کے یوکرین پر حملے کے آغاز پر ہی نیٹو کے سیکریٹری جنرل جینز سٹولٹن برگ کا کہنا تھا کہ نیٹو کا یوکرین کے اندر کوئی فوجی نہیں، نہ ہی ہم بھیجنے کا منصوبہ رکھتے ہیں۔ ہم نیٹو کی سرزمین پر نیٹو فوجیوں کی تعداد بڑھا رہے ہیں۔