یو بی جی رہنماؤں کا آئی ٹی برآمدات 3.5 بلین ڈالر تک پہنچانے کے عزم کا خیرمقدم

کراچی :یونائٹیڈ بزنس گروپ کے سرپرست اعلی ایس ایم منیر،سارک چیمبر آف کامرس کے صدر اور چیئرمین یو بی جی افتخار ملک اور صدر یو بی جی زبیر طفیل نے مستقبل میں آئی ٹی برآمدات ساڑھے 3 بلین ڈالر پہنچانے کے امکانات اور عزم کا خیرمقدم کیا ہے۔

مرکزی ترجمان یونائٹیڈ بزنس گروپ گلزارفیروز کے مطابق یو بی جی رہنماؤں کا کہنا تھا کہ آئی ٹی سیکٹر میں پاکستان کو ملنے والی اس کامیابی نے بین الاقوامی مارکیٹ میں پاکستان کے سافٹ امیج کو بہتر کیا ہے جس سے مستقبل میں آئی ٹی ایکسپورٹ میںمزید اضافہ متوقع ہے۔

انہوں نے کہا کہ آئی ٹی کے شعبے میں مزید نام روشن کرنے کے لیے مسلسل کوششوں کی ضرورت ہے اورہمیں اس بات کی خوشی ہے کہ وفاقی وزیر سید امین الحق نے یہ امید ظاہر کی کہ آئی ٹی برآمدات دسمبر 2022 تک 3.5 بلین ڈالر کے ہدف سے تجاوز کر جائیں گی۔

مزید پڑھیں:آئی ایم ایف کی پاکستان کیلئے قرض کی منظوری، مہنگائی بڑھنے کی وارننگ بھی دیدی

یو بی جی کی قیادت نے بجٹ میں ٹیکسوں اور طریقہ کار میں حکومت کی جانب سے پیش کردہ مختلف مراعات کا بھی خیر مقدم کیا کہ جس کے نتیجے میں آئی ٹی برآمدات کی حوصلہ افزائی ہوئی، خاص طور پر برآمدات کے لحاظ سے جو گزشتہ سال 1.44 بلین امریکی ڈالر کی سطح پر ریکارڈ کی گئی تھی۔

یو بی جی ممبران کا کہنا تھا کہ آئی ٹی معاشی انقلاب لا سکتی ہے جس سے نوجوان نسل کا روشن مستقبل منسلک ہے اور آئی ٹی کی اہمیت سے خاص طور پر کوویڈ کی وبائی مرض کے دوران اس میں موجود مواقع کا اندازہ لگایا جا چکا ہے۔

سرپرست اعلیٰ یو بی جی ایس ایم منیر اور صدر زبیرطفیل نے حکومت سے مطالبہ کیا کہ ٹیلی کام سیکٹر میں نوجوانوں کے استعمال کی اشیاء بالخصوص لیپ ٹاپ کمپیوٹر وغیرہ پر تمام ڈیوٹیاں ختم کی جائیں تاکہ پاکستان کے نوجوانوں کا مستقبل تابناک ہوسکے۔