ترک صدر اور بھارتی وزیر اعظم کی شہباز شریف کو وزیر اعظم منتخب ہونے پر مبارکباد

اسلام آباد:مسلم لیگ ن کے صدر میاں محمد شہباز شریف کے وزیر اعظم منتخب ہونے پر ترکی کے صدر رجب طیب اردوان اور بھارتی وزیر اعظم نریندر مودی نے مبارکباد پیش کی ہے۔

وزیراعظم شہبازشریف کو ترکی کے صدر رجب طیب اردوان نے ٹیلیفون کیا اور وزیراعظم منتخب ہونے پر مبارک پیش کی،انہوں نے کہا کہ آپ کے وزیراعظم منتخب ہونے کی خبر پر بے حد مسرور ہوں، یقین ہے آپ کی قیادت میں پاک ترکی برادرانہ تعلقات میں مزید مضبوطی آئے گی۔

وزیراعظم شہبازشریف نے ٹیلی فون کرنے اور مبارکباد پر صدر اردوان کا شکریہ ادا کیا اور کہا کہ پاکستان اور ترکی بااعتماد بھائی ہیں۔

دوسری جانب سے بھارتی وزیر اعظم نریندر مودی نے بھی اپنے سوشل میڈیا اکاؤنٹ پر ٹوئٹ کرتے ہوئے وزیر اعظم محمد شہباز شریف کو مبارکباد پیش اور نیک تمناؤں کا اظہار کیا۔

Congratulations to H. E. Mian Muhammad Shehbaz Sharif on his election as the Prime Minister of Pakistan. India desires peace and stability in a region free of terror, so that we can focus on our development challenges and ensure the well-being and prosperity of our people.

— Narendra Modi (@narendramodi) April 11, 2022

شہباز شریف نے ملک کے 23ویں وزیراعظم کا حلف اٹھالیا:

پاکستان مسلم لیگ (ن) کے صدر میاں شہباز شریف 174 ووٹ لیکر منتخب ہوئے اور اب انہوں نے ملک کے 23ویں وزیراعظم کا حلف اٹھالیا ہے۔

سابق وزیر اعظم عمران خان کے خلاف تحریک عدم اعتماد کامیاب ہونے کے بعد شہباز شریف اور شاہ محمود قریشی وزارت عظمیٰ کے عہدے کے لئے مدمقابل تھے، تاہم تحریک انصاف نے اجلاس کا بائیکاٹ اور قومی اسمبلی سے استعفے دینے کا اعلان کیا گیا جبکہ جی ڈی اے نے استعفے دینے سے انکار کردیا۔

پاکستان تحریک انصاف کے ارکان ایوان سے باہر چلے گئے جبکہ اس سے قبل قاسم سوری نے اجلاس کو چلانے سے معذرت کرتے ہوئے کہا کہ میرا ضمیر گوارا نہیں کرتا کہ اس عمل کا حصہ بنوں۔

مسلم لیگ ن ک صدر میاں محمد شہباز شریف کو ووٹنگ کے بعد پاکستان کا وزیراعظم منتخب کیا گیا، پاکستان مسلم لیگ (ق) کے چوہدری سالک حسین اور طارق بشیر چیمہ نے بھی پاکستان مسلم لیگ (ن) کے صدر کو ووٹ دیا۔

اس سے قبل وزیر اعظم پاکستان میاں محمد شہباز شریف نے قومی اسمبلی میں اپنے خطاب کے دوران کہا کہ جو شخص یہ کہتا تھا کہ ڈالر اگر ایک روپیہ کم ہو تو ملک مقروض ہوجاتا ہے، لیکن دو سے تین دن کے دوران ڈالر کی قدر میں 8روپے کی کمی واقع ہوئی ہے، اس پر آپ کیا کہیں گے؟

وزیر اعظم شہباز شریف نے کہا کہ قوم کے سامنے ڈرامہ کیا گیا کہ دھمکی آمیز خط ملا، انہوں نے کہا کہ میں بطور وزیر اعظم یہ چاہتا ہوں کہ یہ جو ڈرامہ کیا گیا اس کے بارے میں قوم کو پتہ چلے۔

مزید پڑھیں: شہباز شریف کا دھمکی آمیز خط کی تحقیقات کا اعلان

شہباز شریف نے کہا کہ اگر خط والا معاملہ رتی برابر بھی صحیح ثابت ہوا اور یہ ثابت ہوا کہ دھمکی آمیز خیز ایک حقیقت تھی تو میں استعفیٰ دے کر گھر چلا جاؤں گا۔