ایم فل خواجہ سراء نے تعلیم اور پیشہ ورانہ میدان میں کامیابیوں کے جھنڈے گاڑدئیے

لاہور: ملتان سے تعلق رکھنے والے خواجہ سراء محمد سارم عرف سارو عمران نے ایم فل کرکے تعلیم اور محکمۂ سوشل ویلفیئر پنجاب میں فوکل پرسن اسکل ڈویلپمنٹ تعیناتی سے کامیابیوں کے جھنڈے گاڑ دئیے ہیں۔ ٹرانس جینڈر کمیونٹی ملک کا نام روشن کرنے کیلئے آگے آرہی ہے۔

تفصیلات کے مطابق پنجاب کے تاریخی شہر ملتان کے خواجہ سراء نے کامرس جیسے خشک مضمون میں ایم فل کرکے ٹرانس جینڈرز کیلئے مثال قائم کردی۔ سارو عمران کو محکمۂ سوشل ویلفیئر میں شعبۂ اسکل ڈویلپمنٹ میں ترجمان (فوکل پرسن) کے عہدے پر تعینات کردیا گیا۔

یہ بھی پڑھیں:

اسلام آباد میں معذور بیٹے کی بزرگ ماں غربت سے تنگ، بریانی کاکام شروع کردیا

نجی ٹی وی سے گفتگو کرتے ہوئے سارو عمران کا کہنا تھا کہ میرا مقصد صرف اپنی ہی تعلیم و ترقی نہیں بلکہ ملک بھر کے خواجہ سراؤں کیلئے مثال بننا اور انہیں معاشی مواقع فراہم کرنا ہے تاکہ وہ عزت و احترام کے ساتھ مالی خودمختاری کی منزل حاصل کرسکیں۔

واضح رہے کہ ملک بھر میں شناختی کارڈ اور ووٹ کا حق ملنے سے قبل خواجہ سراء برادری کا کوئی پرسانِ حال نہیں تھا۔ آج بھی بے شمار خواجہ سرا رقص و سرود کا حصہ بننے یا بھیک مانگنے کی بجائے اپنی مرضی کا شعبہ چن کر آگے بڑھنے کا صرف خواب ہی دیکھ سکتے ہیں۔

سارو عمران کو اپنی محنت اور لگن کے بل بوتے پر ترکی میں گلوبل امن سفیر ایوارڈ سے بھی نوازا گیا۔ ملتان کے اس خواجہ سراء کے ساتھی ان کی کامیابی پر خوشی کا اظہار کر رہے ہیں۔ سارو عمران کی کامیابی سے معاشرے میں ٹرانس جینڈرز کی عزت و احترام میں اضافہ ہوگا۔